Assakaasulerfia saamerleq napisoq
Timmisartumillu misissuigallarnerit takutippaat timmisartoq anorlingaatsiartoq sakkortuumik mimmat timmisartup assakaasulerfia saamerleq napimasoq.
Timmisartup minnerata nalaani 16,8 angullugu mittarfiup saneraaniit anorlerpoq. Timmisartullu sarpia asfaltimut kallussaattoq timmisartoq saamiup tungaanut sangujartuutigaluni mittarfiup sinaanut nakkarpoq. Tamakku tamarmik sekundialuit ingerlaneranni pipput.
Maannalu ajutoornerit pillugit ataatsimiisitaliameersut timmisartoq misissuiffigereerlugu Ilulissaniit ullumi aallarput.
- Teknikkikkut paasissutissat timmisartumiittut tamaasa tigusiffigisimalerpagut. Aamma timmisartup ilamernganik tigusivugut. Tassa assakaasulerfia saamerleq. Taanna laboratoriatsinni misissussavarput, Kurt Færch Madsen ajutoornerit pillugit misissuisartoq oqarpoq.
Sulili misissugassarpassuaqarpoq:
- Timmisartup boksia qernertoq aamma tiguarput. Tassaniipput paasissutissat timmisartup maluginiutaanersut tamarmik. Soorlu motori qanoq sukkatigisumik ingerlasimanersoq aammalu timmisartortartut aquutiminnik qanoq ilineratigut tigusisimanerannik imallit. Taakkua tigussavagut. Bokserlu qernertoq Canadaliaanneqarpoq, Kurt Færch Madsen oqarpoq.
Paasissutissalli kisimik misissorneqanngillat. Timmisartoq ajoqusersimaqisoq aamma misissorneqarpoq.
- Timmisartup ilua aamma misissorparput. Isumaqarpugummi timmisartup iluata issiaviillu pisumi qanoq atasinnaatiginerat misissornissaat Ilaasut pillugit pingaaruteqartoq. Matumanilu nuannaarutigeqaarput ilaasut ajoqusersimanngimmata. Aamma issiaviit inissaminniipput, naak timmisartoq ajoqusersimagaluaqisoq, Kurt Færch Madsen oqarpoq.
Misissuinerli suli inerniliiffigineqanngilaq.
Nalunaarusiaagallartussarlu qaammatip imaluunniit qaammatit marluk qaangiunneranni piareerneqassaaq:
- Qaammatip qaammatilluunnit marluk qaangiunneranni Ilimanarpoq. Nalunaarusiami oqaluttuarineqassaaq qanoq pisoqarsimanera aammalu minnermi ajoqusernermut pissutaasut. Kisianni sunarpiaq pissutaanersoq oqaluttuarineqassanngikkallarpoq. Paasissutissarpassuimmi misissuataarneqaqqaassapput. Paasissutissarpassuarnillu maanna peqalereerpugut, Kurt Færch Madsen oqarpoq.
Ajutoornerit pillugit ataatsimiisitaliarsuarmit misissuiartortitat timmisartumi inuttat ajutoornermi ilaasunik anigasuartitsisimanerat nersorpaat. Ilaasummi tamarmik timmisartumit 30 - 40 sekundillu ingerlaneranni qimagutsinneqarsimapput.
