Assagiartassiissutit amerlineqaqquaat
Sisimiuni assagiarsunniat assagiarsoqarfimmik nutaamik nassaarnermikkut, pisassiissutigineqartut 800 tonsiusut aasaanerani tamakkerlugit pisarisimavaat.
septembarip 22-at 2009 07:22
Taamaattumik Sisimiuni assagiarsunniarneq assagiarsunnillu tunisineq ippassaq unitsinneqarpoq, tamannalu assagiarsunnianit naammagineqanngeqaaq.
Assagiarsunniat isumaqarput, assagiarsoqarfimmi nutaami nassaarineqartumi, Nassuttuup Qinnguani, ima assagiarsoqartigimmat amerlanerusunik pisasseqqinneqartariaqaraluarlutik.
Maannamut Holsteinsborg dybimi assagiarsunniarneq ingerlanneqartarsimavoq, tassanilu biologit peqassutsimik naliliinerat tunngavigineqartarluni. Taamaattorli assagiarsunniat isumaqarput, Nassuttuumi assagiarsoqarfimmik nassaarnikkut, Holsteinsborg dybimi peqassutsimik naliliinerit pisoqalisimasut, nutaamillu nalilersuisoqaqqittariaqartoq.
