Aslak Jensen Inatsisartuni sulinngiffeqarnissaminut itigartitaasoq
Aslak Jensen Siumut sinnerlugu Inatsisartunut ilaasortaq, ulluni makkunani upernaakkut Inatsisartuni ataatsimiilluni ulapaaleruttorpoq.
Taanna Nunatta Eqqartuussisuuneqarfianut suliassanngortitseqqiinikuuvoq, taassumali suliarineqarnissaa suli utaqqivaa.
Aslak Jensen Sermersuup eqqartuussiviani januaarimi eqqartuussaagami pinerloqqissaguni ulluni 20-ni pineqaatissinneqarsimasunut inissiisarfimmiittussanngortinneqarpoq.
Taassuma Kommuneqarfik Sermersuumi isumaginninnermut allattoqarfimmi sulisumut toqutsinissamik siorasaarisimasutut unnerluutigineqarnini eqqartuussaassutigaa.
Sulinngiffeqarnissaq Inatsisartoqarfimmit itigartitsissutigineqartoq
Taanna Sermersuup eqqartuussivianit pisuutinneqarpoq, eqqartuussullu Aslak Jensenip nunatta eqqartuussiviineqarfianut suliareqqitassanngortippaa. Tamannali qaqugu suliarineqassanersoq suli aalajangerneqanngilaq.
Inatsisartunut ilaasortaq Aslak Jensen 814-inik taaguunneqarnikuuvoq, taanna Nunatta Eqqartuussisuuneqarfianut suliareqqitassanngortitsinini peqqutigalugu Inatsisartuni sulinngiffeqarallarnissaminik qinnuteqarpoq.
Qinnuteqaataali Inatsisartoqarfimmiit itigartitsissutigineqarpoq. Aslak Jensenip qinnuteqaatini Inatsisartunit itigartinneqartoq nammineerluni KNR-imut oqaatigaa, tamanna sulinngiffeqarnissamut piumasaqaatinut naammassinninngimmat.
- Itigartinneqarama, allamik oqaasissaqanngilanga, Aslak Jensen KNR-imut oqarpoq.
Inatsisartunut ilaasortat ataasiakkaat pillugit Inatsisartoqarfik oqaaseqaqqusaanani KNR-imut erseqqissaassutigaa. Tassunga tunngatillugu Inatsisartoqarfik KNR-imut paasissutissiivoq. Sulinngiffeqarnissamullu qinnuteqaatit akuerineqarnissaannut malittarisassanik innersuussivoq.
Inatsisartunut ilaasortat sulinngiffeqarnissamut malittarisassat aajuku:
- Napparsimanermut atatillugu
- Naartunermut, meerartaarnermut meeravissiartaarnermulluunniit atatillugu
- Qanigisap toqukkut qimagunneranut perululluniluunniit napparsimaneranut atatillugu
- Naalakkersuisunut, Folketingimut kommunalbestyrelsimulluunniit ilaasortatut atuuffiup isumagineqarnissaanut
- Pisuni immikkut ittuni, tamanna namminersorluni ingerlatamini suliassamik nukingernartumik suliassanilluunniit allanik nukingernartunik aallussinissaa pisariaqarluinnartutut isigineqarpat.
Aslak Jensenip Inatsisartuni sulinngiffeqarnissaminut qinnuteqaatai qulaani allaqqasunut naatsorsuutinngitsut, Inatsisartoqarfimmit nalilerneqarput.
Tamanna pillugu Siumut siulittaasuat oqaaseqartinniaraluarparput taannali Inatsisartoqarfimmut innersuussivoq.