Asissuisimasutut eqqartuunneqarpoq
Danmarkimi illoqarfiit ilaanni, Løkkenimi, iffiortup tamanna uppernarsivaa, asissuisimanini pissutigalugu Eqqartuussivissuarmit Vestre Landsretimit 100.000 koruuninik taarsiisussanngortitaagami.
Iffiorfimmi sulisut ilaat anguteqatiminik atoqateqartartoq pisiniartartut suleqatimilu akornanni ”tarnimigut napparsimasutut” nalilerneqartarsimavoq, qeqertamullu inoqanngitsumukaattariaqartoq, imaluunniit Iranimi iliortarnertulli qiminneqassasoq, oqaluuserineqartarsimalluni.
Eqqartuussut taanna eqqaamaneqartuarsinnarpoq. Immikkuullaringaarmammi qanimut assut malittarineqarsimavoq. Tassami sulisup arnaqatiminik anguteqatiminilluunniit atoqateqartarnera pissutigalugu sulisitsisup uumisaarisimanera pillugu aatsaat eqqartuussisutigoortitsisoqarmat. Iffiortullu Peqatigiiffianit, NNF-imit, neriuutigineqarpoq, eqqartuussutip uuma sulisut sulisitsisuminnit pisariaqanngitsumik asissorneqartarnerat pinngitsoortittalissagaa.
