Asilerisut tapiiffigineqarnerunissartik kissaatigaat

Asilerisut aaqqissuussisarnerinut aningaasaliisoqanngippallaarpoq. Taama isumaqarpoq Asilerisoq aamma Namminersornerullutillu Oqartussat Pinngortitamut Avatangiisinullu kajumissaataannik 25.000 koruuninik kajumissaatisisoq Naja Habermann.

Pinngortitaq pillugu suliaqarnermini amerlanerusunik tapiisoqartarnissaa kissaatigaa.

- Neriuppunga taamatut kajumissaasiinerup kingunerissagaa politikerit kommunillu uatsinnik atorfinitsitsisuusut, suliatsinnut tappinnerulernerat paasissagaallu suliavut aningaasaliiffigineqaratik ingerlanneqarsinnaanngitsut, Naja Habermann oqarpoq nangillunilu:

- Tassami uatsinnut sinerissami asilerisunut tallimaasunut pissutsit naammaginartuaannannginnamik. Atorfeqartitaagaluarpugummi akissarsiaqarlutalu, kisianni arlaanik aaqqissuussiniaraangatta aningaasanik qinnuuloortariaqartarpugut imaluunniit aningaasatigut tapersersuisussanik imaluunniit aningaasaateqarfinnut qinnuteqartariaqartarluta. Taamatullu sulineq ilungersunarsinnaasarpoq. Kajumissaasiinerup kingunerisinnaavaa ima eqqarsartoqalernera: Suliaq tamanna pingaaruteqarpoq nersorniarneqarlunilu taava aningaasaliiffigisariaqarparput. Tassami suliassavut suliarisinnaajumallugit aningaasanik pisariaqartitsivugut.

- Asilerisoqarneq ilassilluarneqartorujussuuvoq suliavullu soqutigineqarput pingaarutilittullu isigineqarlutik aamma aaqqissuussigaangatta ornigarneqartaqaat, tamakkua suliamik nuannernerulersitsisarput.

Asilerisut sinerissami tallimaalluta inuiaqatigiinni saaffigisavut allanngorartinniarsarisarpavut, soorlu ilaanni utoqqarnut naleqquttunik neqerooruteqartarluta ilaannikkullu meeqqanut mikisunut ilaatigullu innarluutilinnut naleqquttunik sammisaqartitsisarluta.

Asilerisut kommunit killeqarfii pitarlugit aaqqissuunniagaat tulleq tassaavoq septembarimi 6. klassinut nungusaataanngitsumik piniartarneq pillugu ulloqartitsinermik aaqqissuussiniarneq tamannalu nuna tamakkerlugu aaqqissuunniarneqarpoq.

Nunarput tamakkerlugu asilerisut tallimaapput.