Asilerisut ilinniarlutik naammassipput
Nunatsinni asilerisutut ilinniarneq nutaaq malillugu ilinniagaqartut siulliit ilinniakkaminnik naammassinnereerput. Taakkua tallimaasut ullaap tungaa ilinniakkatik naapertorlugit sulillutik misilippaat. Tamanna Nuummi Nuussuup Atuarfiani ingerlanneqarpoq, atuartut puisi attorlugu misilippaat ooqanngitsumillu tinguttortinneqarlutik.
Nuummi Nuussuup Atuarfiani atuartut taama nipeqarput asilerisup puisip inaluai seqeermagit. Asilerisup nassuiaakkaluarmatik qasertoq kinertoq tassaasoq puisip nerisimasaata uukkap sinnikua uloriananngilluinnartorlu, taamaakkaluartoq atuartut maajugerpasittorujussuuaat.
Tamatumunnga immaqa patsisaavoq nunatsinni meerarpassuit puisimik toqungasumik takusimanngisaannarmata. Tamannali asilerisut allanngortikkusuppaat. Taamaattumik Nuussuup Atuarfiani puisit marluk ininut atuartut atuarfigisartagaannut eqqullugit misissuataarneqarput. Tassani atuartut 60-it atuaqatigiinnit assigiinngitsunit pingasuneersut puisip inaluai attorlugit misilissinnaavaat tinguttorlutillu.
- Misilillugu tinguttorluni eqqumeeqaaq. Tinguk aattaqartorujussuugami, tinguttorama qanera aaginnanngorpoq, kisianni mamaqaaq. Aamma puisi attorlugu nippoqqaartuinnaavoq.
Taama oqaluttuarpoq arfineq-pingasunik ukiulik Celin Martha Papis Hansen. Kisianni meeqqat tamarmik Celinitulli puisi attorlugu tinguttorlutillu misilinnikuunngilaat. Taamaattumik asilerisut atuarfimmukarlutik paasisitsiniaapput. Taama oqarpoq Naja Habermann Ilulissani asilerisutut atorfeqartoq nunatsinnilu asilerisunut ataqatigiissaarisuusoq.
- Meeqqat immaqa puisitortaraluarlutik puisimik ilivitsumik takusimanngisaannarput, taamalu ilaatigut erlavii qanoq isikkoqartut nalusarlugit. Ullutsinni taamatut illoqarfissuartut Nuuttut ittumi meeqqanik paasisitsiniaanissaq pisariaqalersimavoq, Naja Habermann oqarpoq.
Asilerisutut ilinniakkaminnik naammassinnittut nutaat tallimaasut kommunini assigiinngitsuni tallimani atorfeqarput: Nuummi, Sisimiuni, Ilulissani, Qaqortumi Upernavimmilu. Taakkua assigiinngitsunik sammisaqartitsisarput, soorlu eqqakkanik immikkoortiterinermik takornariaqarnermillu. Assersuutigalugu Ilulissani asilerisoq qimussit aqqutaannik saligaatsuutitsinissamik paasisitsiniaalluni aallartissimavoq. Asilerisunik nutaanik marlunnik ilinniartitsinissaq pilersaarutaavoq.
