Asii Narup: KANUKOKA ullutsinnut naleqqussartariaqarpoq

Kommunit sisamaasut kattuffiat KANUKOKA aaqqissuuteqqinneqarlunilu nutarterneqassaaq ullutsinnut naleqqussarlugu. Aamma ilaasortaanermut akiliut appartinneqassaaq. Kommuneqarfiit Kattuffiat upernaamut ataatsimeersualerpat Kommuneqarfik Sermersuup kommunalbestyrelseata siunnersuutiginiagaasa ilaat tamakkuupput.
Allattoq Apollo Jeremiassen
februaarip 25-at 2010 16:08

- KANUKOKAp aaqqissuuteqqinneqarnissaa siunertaralugu oqallittoqartariaqarpoq, Asii Chemnitz Narup oqarpoq nangillunilu. - KANUKOKA ullutsinnut naleqquttumik aaqqissuuteqqinneqartariaqarpoq. Maanna kommunit sisamaannaavungut, piumasaqaativullu allarluinnaapput, taamaammat tamanna tunngavigalugu KANUKOKA naleqqussartariaqarpoq, oqarpoq.

KANUKOKA-p suliarisarsimasai maanna kommuninit tingujartuaarneqarput, taamaattumillu ilaasortaanermut akiliupput appartinneqartariaqartoq Asii Chemnitz Narup isumaqarpoq.

Kommuneqarfik Sermersooq KANUKOKA-mut ukiumut 4,7 millioni koruuninik akiliisarpoq, kommuneit tamarmiullutik 12,5 millioni koruuninik akiuliuteqartarput.

- Siornatigut kommunitta KANUKOKA suliassanik imittarpaa, maannali uagut nammineq suliassat tingujartuaarpavut, tamanna tunngavigalugu akiliutigisartagarput appartinneqartariaqarpoq. Taassuma oqallisigineqarnissaanut ammavugut suleqataarusullutalu, Asii Chemnitz Narup oqarpoq.

Upernaamut maajimi Ilulissani KANUKOKA ataatsimeersualerpat, Kommuneqarfik Sermersuup oqaluuserisassatut aalajangiiffigisassatullu siunnersuutaat ilaatigut ukuupput:

- KANUKOKA-p suliassai pillugit killiffissiuisoqartariarpoq, KANUKOKA naleqqussartariaqarpoq. Kommunit 18-ujunnaarpungut taamaattumik ullutsinnut neleqquttumik aaqqiisoqartariaqalerpoq.

Taama naggasiivoq borgmester Asii Chemnitz Narup. Kommuneqarfik Sermersuup borgmesteriata aamma erseqqissaassutigaa KANUKOKA atorfissaqartuassammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq