Asii : Kalaallit Herstedvesterimiittut immikkoortinneqarput
Kalaallit Herstedvesterimi inissitat pillugit inatsisinut ilisimatuup Evy Frantzsenip nalunaarusiaa tallimanngormat saqqummiunneqarpoq. Kalaallit Herstedvesteriliartinneqartartut pillugit paasissutissat toqqortaatit Evy Frantzenip misissuinermini tunngavigisimavai, taakkulu malillugit manna tikillugu Hestedvesterimut aallartitsisarnerit 113-iupput. Nalunaarusiamissaaq atuarneqarsinnaavoq kalaallit parnaarussanut qallunaanut naleqqiullutik imikkoortinneqartartut, tamannalu akuersaarneqarsinnaanngitsoq
Inatsisartuni ilaasortaq Inuit Ataqatigiinneersoq, inatsisartut Inatsisinik atortitsinermut ataatsimiititaliaanni ilaasortaq Asii Chemnitz Narup oqarpoq:
- Nalunaarusiaq marloqiusatut atorneqarsinnaasutut takorloorpara. Eqqartussiveqarneq pillugu aaqqissuusseqqinnermut pingaaruteqartorujussuuvoq, Herstedvesterimiittut angerlartilerutsigit, qanoq ittumik aaqqissuussiffigisariaqarnerivut pitsaasumik pineqarnissaat eqqarsaatigalugu.
Asii Chemnitz Narup isumaqarpoq equngassutsit massakkut ersarissuanngortut.
- Nukinginnartutut iliuuseqarfigisariaqarpoq Herstedvestrimi kalaallit qallunaallu assigiinngitsumik pineqartarnerat. Tamanna minnerpaamilluunniit akuerineqarsinnaanngilaq. Inatsisartut inatsisinik atortitsinermut ataatsimiititaliaani juunip naalernerani ataatsimiittussaavugut, taanna oqaluuserisassanngortissavara.
Asii Chemnitz Narup erseqqissaavoq immikkoortitsinermut atatillugu paasitinneqarlutik Herstedvesterimiittut qanigisaminnik toqusooraangamik angerlarlutik ilisinermut peqataarusuttartut.
- Kisianni kalaaleqatigut qanoq amerlatigisunik itigartinneqartarsimapput paarlattuanillu qallunaat pinerit tamaasa akuerineqartarsimallutik. Taanna akuersaarneqarsinnaanngilluinnarpoq, assigiinngisitsineq ersarippoq piaartumillu iliuuseqarfigisariaqarluni.
