Asii: Eqqartuussiveqarnikkut iluarsaaqqiineq naalakkersuisunit pingaartinneqanngilaq
Asii Chemnitz Narup sapaatip akunneri arlallit matuma siornatigut paragraf 36 atorlugu naalakkersuisut siulittaasuannut apeqquteqarpoq, Kalaallit Nunaanni nunap immikkoortuini eqqartuussivinni sulianik naammassinninniartarnerit sivisussaat ilaatigut pillugu.
Nanortallip eqqartuussiviani suliassanik isumaginninnerup ukiup affaanik sivisussuseqartarnera pillugu Asii Chemnitz Narupip apeqquteqarnermimut tunngavilersuutaasa ilagaat. Naalakkersuisut siulittaasuat ullumi akissuteqarluni allappoq Kalaallit Nunaanni eqqartuussiveqarnermut tunngasut danskit suli oqartussaaffigalugillu akisussaaffigimmatigik, tassunga ilanngullugit nunap immikkortuini eqqartuussivinni pissutsit, Asii Chemnitz Narupip apeqquteqaatigisai, naalakkersuisunit danskit Inatsiseqarnermut ministerianut oqaaseqarfigisassanngorlugit ingerlateqqinneqartut.
Akissutigineqartut tiguneqarniariarpata Inatsisartunut ingerlateqqinneqarumaartut, naalakkersuisut siulittaasuat akissuteqarluni allappoq.