Assi: Kommuneqarfik Sermersooq

Asii Chemnitz Narupip isornartorsiuisoqarnera tupigusuutigaa

Kommuneqarfik Sermersuup illoqarfiit pingaarnersaannut periusissialiornini pillugu kommuninit allanit isornartorsiorneqarnera tupigusunnartoq, borgmesteri Asii Chemnitz Narup isumaqarpoq.

- Eqqarsarnartoqartippara aamma tupigusoqaanga, Asii Chemnitz Narup taama oqarpoq.

Aamma  kommunalbestyresip tamarmiusup, tassalu aamma illoqarfinnit allaneersut, periusissiamut akuerseqataasut erseqqissarpaa.

Kommuneqarfik Sermersuup Nuup alliartornissaanut periusissiaa, innuttaasut 2030-mi 30.000-iulernissaannik anguniagaqartoq, kommuninit allanit isornartorsiorneqarpoq.

Inoqarfiit arlallit inuerunnissaat Qaasuitsup Kommunianit ermunassutigineqarpoq, Nuujunerusullu ineriartornerulernissaa Qeqqata Kommunianit aarlerissutigineqarluni.

AAMMA ATUARUK Kommuneqarfik Sermersuup periusissiaa kommuninit allanit iluarineqanngitsoq

Pinngitsaaliillunili nuutsitsiniaasoqanngitsoq, Asii Chemnitz Narupip erseqqissaatigaa.

- Uagut inuit kommuneqarfitta avataani najugaqartut pinngitsaalillugit nuutsinniarsarinngilagut. Nuuk maannamut nuussorfigineqartorujussuuvoq. Inuit namminneq kissaatigisaminnik nuuttarput, allaat inissaqarnatik suliffissaqarnatillu, Asii Chemnitz Narup taama oqarpoq.

Taassuma oqaluttaraa Nuummut nuuuttut, tamaani inissaqaratik paasigaangamikku Danmarkimut ingerlaqqittartut.  

- Uagut Nunatsinnit nuuttorpassuit nuunnatik Nunatsinniiginnarnissaat kissaatigisorujussuuagut, taava aamma kalaallit Danmarkimi najugallit Nunatsinnut nuunnissaat kajuminnarnerutinniarlugu Nuup alliartornissaa sulissutigigitsik Narupip oqaatigaa.

AAMMA ATUARUK Nuummi innuttaasut ukiut 13-it qaangiuppata 30.000-it

Periusissiarli ataqqinninngitsuusoq, Qaasuitsup Kommuniani borgmesterip tullersortaa, Jess Svane, isumaqarpoq. Tamannali Narupip tupigusuutigaa.

Taassumami ilaqutariinnut meerartalinnut periarfissanik siunissamillu upperinnilernissamik neqerooruteqartoqarsinnaanngippat Nunatta inuerukkaluttuinnarnissaa ernummatigaa.

Periusissialiortoqarnera Kommune Kujallermi borgmesterip ajorinngikkaluarlugu una periusissiaq piviusorsiorsorinngilaa. Qanorli iliortoqarniarnersoq februaarip aallaqqaataani nalunaarutigineqarumaartoq, Narupip oqaatigeqqippaa.

Periusissiap piviusunngortinneqarnissaanut suleriaaserineqartoq kommuninit allanit isumassarsiorfigineqarusussappat isumasioqatigiisitsinissani soqutigalugu Asii Chemnitz Narupip aamma oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat