Asii Chemnitz Narup nikassaasoqarpallaarmat tunuarpoq

- Naalakkersuisooqatigiit iluanni nakkartitsiniaanerit akornusersuiniarnerillu akuersaarsinnaanngilakka, Peqqissutsimut naalakkersuisoq Inuit Ataqatigiiusoq Asii Chemnitz Narup ullumi tunuarnerminik nalunaarummini taama tunngavilersuivoq.

- Qaammatini kingullerni Inatsisartuni naalakkersuisunilu inuiaqatigiinnilu oqalliseriaaseq imatut nalilertariaqalersimagakku siumut isigisumik ineriartortitseqataarusunnermik nipaqarunnaarluni nakkartitsiniaanermik akornusersuiniarnertullu paasilerakku tunuarpunga tamannalu akuersaarneqarsinnaanngilaq, Asii Chemnitz Narup oqarpoq.

Taanna qalleqqissaalluni oqarpoq Peqqissutsimut pisortaqarfimmi inerisaanerit aallarteruttortut akornuserneqarnatik ingerlasariaqarsorigamigit namminerlu akornutaasimaguni tunuarnissi iluarnerutissimagini.

Aperaarput kikkunniit nakkarsarneqartutut misigisimanersoq.

- Inuiaqatigiinni oqallinnermi malinnaalluartut ilisimaarivaat innuttaasut peqqissuunissaannik suliniummut tunngassuteqartumi qanoq periaaseqartoqarsimasoq inatsisartuni. Peqqinnissaqarfiup nutaamik aaqqissuunneqarnissaannut tunngatillugu atorfillit sulileruttorfiisa nalaanni isertuussisutut nakorsaatinut akit qaffariartornissaanut tunngatillugu, aammalu avatangiisinut aningaasaateqarfimmik pilersitsinissamut tunngasut naalakkersuisuni ilaasortaninngaanniit uparuaanerinnaanngitsumik kisiannili nakkarsaanermik nikassaanermillu nipilimmik sulisoqalermat isumaqarpunga aalajangertariaqarlunga tunuarniuteqassallunga, Asii Chemnitz Narup oqarpoq.

Nangilluni erseqqissaavoq naalakkersuisut partiit pingasuusut suleqatigiinnissaminnik akuersaarsimagunik anguniakkallu pingaarutillit inuiaqatigiinni iluaqutaasussat suleqatigiissutigiumallugit akuersaarsimagaanni taava taakku anguniakkat piviusunngortinnissaat salliutillugu sulinissaq pingaaruteqartorujussuuvoq inuttarsiuinerit piunnaarlugit atorfissaqanngillat! Inuiaqatigiinni kigaalaqutaapput suliassanik pissanganartunik ulikkaarpoq taakkualu naammassineqartariaqarput,

Asii Chemnitz Narup-ip naalakkersuisutut tunuarpoq arsarnernik taallugu naalakkersuisooqatigiit pilersinneqarneriniit ukioq ataaserpiaq qaangiuttorlu.