Asii Chemnitz Narup malersorneqartutut misigivoq

Inuit Ataqatigiinneersoq Asii Chemnitz Narup Peqqissutsimut naalakkersuisutut ullumi tunuarpoq, nammineq oqarnermisut, ilaatigut pasillernerit inuttullu nakkarsaanerit akueriumanagit.

Taamaattoqarsimasinnaanera Inuit Ataqatigiit siulittaasuata Josef Motzfeldtip ilisarisinnaanerarpaa.

- Asii Chemnitz Narupip tunuarnerminut atatillugu oqaaserisai qaammatini marlussunni kingullerni suleqatigiinnermut tunngasut ajoraluartumik ilumoortortaqarput. Inuit Ataqatigiit siulittaasuat Josef Motzfeldt oqarpoq.

Inatsisartut akornanni naalakkersuisullu akunnerminni pasilliiniartoqarsimaneranik inunnillu nakkarsaaniartoqarsimaneranik Asii Chemnitz Narupip oqalunnera aamma assortorsinnaannginnerarpaa.

- Nammineq taama naliliivoq, tamannalu assortorsinnaanngilara. Josef Motzfeldt nassuiaavoq.

Pasilliinerni nakkarsaanernilu Inuit Ataqatigiit pineqarsimassappata naalakkersuisoqatigiinnermit aninissaq eqqarsaatigineqarsimanersoq Josef Motzfeldt aperineqarami akivoq, tamanna Inuit Ataqatigiit Inatsisartuni gruppeata siulersuisullu sukumiisumik ilanngullugu nalilersorsimagaat.

- IA-li naalakkersuisooqatigiinnit anissappat qinersisitsisoqartariaqalissaaq, naalakkersuisooqatigiinnermilu ukioq ataaseq qaangiutinngitsorluunnit qinersisoqartariaqalissappat uagut pissutigaluta taamaaliortoqarnissaa kissaatiginngilarput. Josef Motzfeldt erseqqissaavoq.

Aamma oqarpoq, suleqatigiinnermut akisussaasoq tassaasoq koordinationsudvalgi, tassalu ataqatigiissaarinermut ataatsimiititaliaq, matumanili naalakkersuisut siulittaasuat Hans Enoksen ileqqorissaarnissamik qulakkeerinninnissamik siuttuusoq. Ileqqorissaarnissamik qulakkeerinninnissamik Hans Enoksen pikkorippallaarsimannginnersoq pillugu aperigatsinni ima akivoq:

- Koordinationsudvalgip, tassalu ataqatigiissaarinermut ataatsimiititaliap ataatsimoorluni sulinissani matumani pikkoriffigivallaarsimanngilaa. Josef Motzfeldt oqarpoq.