Asii Chemnitz Narup Hans Enoksenimik isornartorsiuivoq

- Savalimmiormiut allaffissornikkut suleriaatsit pillugit suleqatikkuminarunaraluarput. Periarfissaq tamanna atorluarneqarsinnaagaluarpoq.

Namminersornerullutik Oqartussani allaffissornerujussuup annikillisarneqarnissaanut oqallinnermut tunngatillugu Inuit Ataqatigiit siulittaasuata tullia Asii Chemnitz Narup taama isumaqarpoq:

- Allaanerusumut ikaarsaarnissamut tigussaanerusumik sulilertariaqarpugut. Misissueqqissaarnerit pisariaqarput, aamma nunanik allanik suleqateqarnissaq pisariaqartorujussuussammat, Inuit Ataqatigiinnit Savalimmiut piukkuppagut. Qinikkatut sulisuusugut Savalimmiunut tikeraarangatta Savalimmiormiut nuannaartoralugillu tupaallaatigisaqaagut allaffissornermik ingerlatsinermi minnerpaaffiliisinnaammata, Asii Chemnitz Narup oqarpoq, nangillunilu:

- Allaffissornermik aqutsinermillu immikkut sammisalimmik Ilisimatusarfimmi instituteqarpugut, Niuernermik Ilinniarfimk aamma atorluarneqarsinnaavoq, Inuit Ataqatigiit siulittaasuata tullia Asii Chemnitz Narup oqarpoq.

Kalaallit Nunaata Savalimmiullu akunnerminni isumaqatigiissutaat annertusineqarnerata kingorna Asii Chemnitz Narup naalakkersuisut siulittaasuannik Hans Enoksenimik isornartorsiuivoq, isumaqatigiissummik atsioqatigiinnermi allaffissornermik minnerpaaffiliinissaq angujumallugu annertunerusumik suleqatigiinnissaq isumaqatigiissutigineqarsimasariaqaraluartoq aamma isumaqarpunga, Asii Chemnitz Narup oqarpoq.

Nunani taakkunani inuussutissarsiornermut, ilinniarnermut ilisimatusarnermullu tunngasut suleqatigiissutigineqarnerunissaat atsioqatigiissutigineqarpoq, aalisarnermullu isumaqatigiissut aamma nutarterneqarluni.

Ilisimasanik misilittakkanillu paarlaasseqatigiinnissaq isumaqatigiissummi ilaareersoq, Hans Enoksen tusagassiutinut nalunaarummini ualiartoq allappoq.