Asii Chemnitz Narup borgmesterinngoriaannaavoq

- Soorunami imaaliallaannaq akiuminaappoq kisianni qamanngavik qinersiserpassuannut qujarusuppunga, aammami taakku tunuliaqutsiipput naalakkersuinikkut suleqataanissannut, aamma pisussaaffiliivoq angisuumik taamaattumik massakkut nuannaarluta Inuit Ataqatigiinni isumaqatiginninniarnissamut piareersarpugut, Asii Chemnitz Narup oqarpoq. Nangipporlu:

- Isumaqarpunga naalakkersuinikkut anguniakkatta ersarissuunerat aammalu sulinitsinni aalajaatsumik taakkua piviusunngortinniarlugit sangujoraarnata ingerlanerput massakkut inuiaqatigiinniit paasineqarluni annertuumik tunuliaqutserneqartoq, oqarpoq.

Asii Chemnitz Narup aperaarput borgmesterinngortinneqarnissi piumasarineqassagaluarpat qanoq akissagaluarnersoq.

- Isumaqarpunga qinersiserpassuarma nalunaaraat tassunga piukkunneqartunga, taamaattumik tassunga aamma uanga ammavunga, akivoq.

Ilutigitillugu aperaarput sunniuteqarsinnaanini qanoq atussaneraa.

- Massakkut Inuit ataqatigiinni pisarnitsituut naligiilluta oqallippugut isummagut pikialaartippavut. Aamma taamatut naligiilluta qineqqusaarpugut, partiinut allanut sanilliullugu tassuunakkut assigiinngissuteqarpugut tassami siuttoqarnata uagut sassaratta, aamma naligiilluta massakkut suleqatigiippugut, taama oqarpoq qinigaarlaaq Asii Chemnitz Narup.