Asii Aningaasaqarnermullu Ataatsimiititaq aqagu Ittoqqortoormiinukassapput
Tikeraarnermi tassani innuttaasut peqataatinneqarnissaat oqaloqatigineqarnissaallu qitiutinneqassaaq aammalu suleqatigiinnissamut isumaqatigiissummut atatillugu Tamakkiisumik pilersaarut killiffissiorneqassaaq.
Tamakkiisumik pilersaarut Ittoqqortoormiinut tunngatillugu suliaavoq, siorna aasap ukiallu ingerlanerani innuttaasunik oqaloqatiginnittarnerpassuit tunngavigalugit.
Sisamanngorpat unnukkut nereqatigiinnertalimmik innuttaasunik ataatsimiisitsisoqassaaq. Tassani sammineqarlutik qitiutinneqartussat tassaapput: Meeqqat inuusuttullu, inuussutissarsiorneq suliffissaqarnerlu, aamma atornerluineq kiisalu peqqinneq pitsaaliuinerlu.
Pisortaanertut atorfineqqammersoq Steffen Ulrich-Lynge illoqarfik pillugu sukumiisumik ilisarititsiffigineqassaaq. Kommunimi sulisut ilassissavai illoqarfimmilu suliffeqarfinnik inuussutissarsiorfinnillu pulaagaqassalluni.
Aningaasaqarnermut Ataatsimiititami nutaamik ilaasortanngortut aamma Ittoqqortoormiit pillugit sukumiisumik ilisarititsiffigineqassapput. Tamatumunngalu atatillugu illoqarfimmi qinikkanik ataatsimeeqateqassapput, suleqatigiinnissamullu isumaqatigiissut eqqartussallugu.
Tikeraarnermut atatillugu aamma Silap pissusaanut, Nukissiuuteqarnermut Sanaartornermullu ministeri Martin Lidegaard naapinneqassaaq, taanna Ineqarnermut, Pinngortitamut Avatangiisinullu Naalakkersuisoq, Miiti Lynge peqatigalugu Ittoqqortoormiiniissammat. Oqaloqatigiinnermi sammineqassapput silap pissusaata allanngoriartornerata illoqarfimmut sunniutai. – Peqataasussat allat tassapput, Piniartoq Jonas Napatoq aamma Tore Andreassen, Sermersooq Business Council-imeersoq.
Tikeraarneq pissaaq marlunngornermi aggustip ulluisa 20-aniit tallimanngornermi aggustip ulluisa 23-ata tungaanut.