Asiaq Qullissat pillugit toqqortaatinik saqqummiussivoq
Tamannalu Kunngikkormiut Qullissanut tikeraarnerat taamatullu nunani tamalaaneersut ilisimatusartut aamarsuarsiorfiusimasumiinnerat iluatsillugu Asiameersut Qullissaniipput toqqortaasivimmiillutillu.
Ukiuni qulini 1958-imit 1968-imut pisimasut toqqortaasivimmiipput. Illoqarfiup teknikkikkut ingerlalluartup ineriartornera kingulleq atorunnaarsinneqariartorneralu toqqortaatigineqartuni taakkunani nassaassaapput.
Tassaniipput aamarsuarsiorfiusimasup uuttortaavigineqarsimanera siusissoq, illoqarfiup atuarfiata illutaata oqaluttuassartaa, imermik pilersuineq pillugu apeqqutit uteqqiattut oqaluttuassartallu assigiinngitsut allat, Qullissat ineriartorsimaneranik aserfallatsaaliorneranik paasissutissaqarluni.
- Qullissat oqaluttuatoqaavoq piareersaanermut pilersaarusiornermullu suli ilinniarfigisinnaasarput. Asiaq tamatuma peqatigisaanik paasissutissaatimi qarasaasiakkut saqqummiunnissannik sulissuteqarpoq, Qullissallu sungiusaatigissallugu tunngavissatsialaavoq. Neriuppugullu teknikkikkut toqqortaatit inuppassuarnit soqutigineqarlutillu ilikkagaqarfissatut isumaqarfigineqassasut. Ukiuni aggersuni annertunerusumik saqqummiussisoqartarumaarpoq, taama oqarpoq suliniutinut pisortaq aamma misissueqqaarnernut pisortaagallartoq Henrik Forsborg.
Nunap ilusaa malillugu silannaakkut assiliortornissamut aammalu Google Streetviewimut assiliinissamut Asiameersut juunimi Qullissaniipput. Aamarsiorfiusimasoq qaqortunik krydsilersorneqarpoq allanillu nalunaaqutsersorneqarluni, Nunatta qaammataasanit assiliortorneqarneranut najoqqutassanut nalunaaqutsersorneranut Qullissat atorneqassaaq.
