Asiami sukkorneq nappaataalerpoq
Pomfritsit, burgerit, colat mamakujuttullu sukkornermut diabetes 2-mut peqqutaagunanngillat. Taamatut nappaateqartarneq nunani killerni akimasuuni peqqinnanngitsumik inooriaaseqarnermut pualavallaarnermullu ataneqartittarparput. Taamaaginnarniarunanngilarli. Diabetes 2-p allatorluinnaq siaruaakkiartornera ilisimatuut ilaasa paasivaat, diabetes 2-lu nunarsuarmi tamarmi ajornartorsiutaasoq oqaatigalugu.
Ullumikkut inuit 240 millionit nappaat taanna nappaatigaat 2025-milu inuit 380 millionit sukkornermik taassuminnga nappaateqalersimassapput, taakkulu 60 procentii Asiamiuussapput, amerlanerit annikitsumik akunnattumillu isertitaqartuninngaanniissapput.
Inuusuttut pualanngitsut nappaatip siullertut eqqortarpai.
Asiamiut nerisaat nunani killerni nerisassanit orsukinnerupput naatitanillu akoqarnerullutik. Taamaattumik tamaani inuit naakinnerullutillu nulukinnerupput. Timillu immikkoortuini taakkunani orsup insuliniliorneq akornusersortarpaa taamaasillunilu sukkortoqalersarpoq. Ilisimatusartut taama ineriartortoqarnera arlalinnik nassuiaatissaqartippaat.
Professor Steven Corbett Sidneyp universitetianeersoq ima isumaqarpoq:
Ukiuni tusintilikkaani Asiamiut uumasuutiminnik naatitaminnillu inuussuteqarsimapput, ukiumullu qaammatini arlalinni perlilertarlutik. Europamiut nerisaasa allanngoriartorsimanerat ukiuni kingullerni 200-ni ingerlasimasoq Asiamiut tamanna allanngoriartorneq ukiuni 40-ni atorsimavaat. Sukkortoqalernerujussuanut tamanna peqqutaasimassaaq.
Asiami arnat naartunerminni nunani killerni arnanut sanilliullutik marloriaammik pingasoriaammilluunniit sukkulernissaminnut qaninnerupput. Taamaalilluni taakku meeraat sukkulernissaannut aarlerinaat annerusarpoq.
