Asiami nunani siullersaalluni suiaqatiminoortartut katissinnaanissaannut akuersisoq

Taiwan Asiami nunani siullersaalluni suiaqatiminoortartut katissinnaanissaannut akuersivoq. Partii naalakkersuisoqartitsisoq DDP, siunnersuutip inatsisartuni akuerineqarnissaanut pimoorussinerpaajuvoq, 66-illu siunnersuummut akuersillutik taasisut 27-it akerliullutik taasipput.

- Naligiittoqalivinnissaanut alloriarujussuarpugut, Taiwanilu nunatut pitsaanerulersipparput, præsident Tsai Ing-wen allappoq

Tamanna inunnit tuusintilikkuutaanit Taiwanip aqquserngini nalliuttorsiutigineqarpoq.

Suiaqatiminoortartulli katinnissaminnut allatulli pisinnaatitaaffeqalernerat tamanit nuannaarutigineqanngilaq.

Inuttaasut 2018-imi taasitinneqarneranni amerlanerussuteqartut suiaqatiminoortartut katissinnaanissaat akerleraat.

Præsidentip inuit siorna taasisinneqarnerata inernera malillugu iliuuseqannginnera partiimit illuatungiliuttumit Kuimintangimit isornartorsiorneqarpoq.

- Inuttaasut taasisinneqarnerata inernera, inuit piumasaannik takutitsisoq qanoq soqutigisinnaanngilarput? Naapertuuttumik naaperiuteqarsinnaavugut?, Koumintangimeersoq John Wu aperivoq.

Nutaarsiassaqartitsivik Reuters naapertorlugu, aamma suleqatigiit qanganisalerisut Coalition for the Happiness of Our Next Generation inatsit innuttaasunut ataqqinnginnerusoq allappoq.

- Innuttaasut taasisinneqarneranni inuit 7 millionit piumasaat soqutigineqanngilaq. Inuit 2020-mi akisilluni periassapput, suleqatigiit Taiwanimi qinersinissaq eqqarsaatigalugu allappoq.