ASAP Rocky nakuusersimannginnerarpoq
Amerikamiu rappertartoq ASAP Rocky angummut 19-inik ukiulimmut nakuusersimasutut pinngitsuunerarpoq, angut taanna Stockholmimi aqqusinermi juunip 30-ani isumaqatigiinngissuteqarfigisimavaa.
Nutaarsiassaqartitsivik AFP taama allappoq.
Stockholmip Eqqaartuussiviani marlunngornermi ullo’qeqqata siornatigut eqqartuussineq aallartippoq aggustillu aallaqqaataani aappaanilu nanginneqassalluni.
Nutaarsiassaqartitsivik naapertorlugu ASAP Rockyp eqqartuussissuserisua eqqartuussivimmi nassuiaavoq saassussineq imminut illersorniarnerusoq, tassami angutip 19-inik ukiullip rappertartoq ilaalu malersugarisimammagit ajorsitsaarsimallugillu.
- Nassuerutigaa (ASAP Rockyp, aaqq.) pinerluttuliornermi eqqugaasoq ajallugu uppitissimallugu, taliatigut tutisimallugu tuiatigullu patissimalluguluunniit ajassimallugu, ASAP Rockyp eqqartuusissuserisua, Slobodan Jovicic eqqartuussivimmut oqarpoq.
Arnaa aamma eqqartuussivimmiippoq
Ekstra Bladet naapertorlugu eqqartuussineq svenskisut ingerlanneqarpoq. ASAP Rocky unnerluutigineqartullu allat marluk nutserisoqarput.
Rappertartup ilaqutai, taakkununnga ilaalluni Renee Black, eqqartuussivimmi najuupput. ASAP Rocky nakuusersimasutut eqqartuunneqassaguni ukiut marluk tikillugit parnaarussaasinnaavoq.
Rappertartoq 30-nik ukiulik, Rakim Mayersimik ativeqartoq, juuli aallartittoq tigusaavoq.
Rappertartup tigusarineqarnerani USA-p præsidentia Donald Trump Amerikamiullu tusaamasat arlallit iperagaanissaanik kaammatuuteqarput. Kaammattuisunut ilaapput tv-kkut tusaamasaq Kim Kardashian West uialu rappertartoq Kanye West suliaq pillugu Trumpimik Stefan Löfvenimut sianersimavoq rappertartorlu tusaamasaq aningaasanik akiliilluni qularnaveeqquserniarlugu.
ASAP Rockyp nuannarinnittai arlallit attaveqaqatigiittarfitsigut svenskit nioqqutissaannik suliffeqarfiutaannillu ilaatigut Ikeamik mattussinissamut kaammattuipput.
Siusinnerusukkut atsiortitsinernik katersinermi tusaamasarsuit ilaat assersuutigalugu Post Malone, Justin Bieber aamma Frank Ocean rappertartumut tapersersuinut ilanngupput.
