Nittartakkap Artop meeqqat atuarfiini ilinniarfinnilu matuneqarnera Kalaallit Ilinniagaqartut Kattuffiannit naammagittaalliutigineqarniarpoq. Inuusuttuaqqat nittartagaq Arto ilikkagaqarfigilluartaraat, KIK-mi siulittaasup erseqqissarpaa.
Nittartakkap Artop meeqqat atuarfiini ilinniartoqarfinnilu matuneqarnera Kalaallit Ilinniagaqartut Kattuffiannit, KIK-mit iluarineqanngilluinnarpoq.
Inuusuttut nittartakkamik Artomik atuisinnaajunnaarnertik ajuusaarutigalugu aqqusinermi KIK-mi siulittaasumut Tola Rosing Karlsenimut oqaluttuarsimapput. Tamanna tunngavigalugu kattuffimmiit nittartakkap Artop atorunnaarsinneqarnera piaarnerpaamik naammagittaalliutigineqarniarpoq.
Nittartagaq Arto inuusuttut ulluinnarni inuuneranni KIK-p siulittaasuanit pingaaruteqartutut isigineqarpoq:
- Inuusuttut imminnut attaveqatigiinnerata ingerlatiinnarneqarnissaa pisariaqarpoq. Inuusuttut imminnut attaveqatigiittarnerat iluaqutitut isigivarput. Allaqatigiinnikkut allalluarsinnaaneq inuusuttut ilinniartarpaat. Inuiaat allat oqaasiinik ilinniartarput kammalaatitaartortarlutillu. ATTAT Artomut naleqqiunneqarsinnaanngilaq. ATTAT ilinniartuniit atorneqarneqassappat Artotut pitsanngorsarneqartariaqarpoq.
KIK-mi siulittaasoq Tola Rosing Karlsen taama oqarpoq.
Naammagittaalliutip oqaasertassai suli qanoq nipeqassanersut KIK-mit aalajangerneqanngillat, aqaguli unnukkut ataatsimiinnermi eqqartorneqarniarput.