Arto meeqqat atuarfiini ilinniarfeqarfinnilu matuneqarpoq
Nittartagaq, Arto, meeqqat atuarfiini ilinniarfinnilu matuneqarpoq. Meeqqat inuusuttuaqqallu Artomi nittartakkatik atuarfimmiit atorsinnaajunnaarpaat.
Nunatsinni inuusuttuaqqat nittartagaat Artomiittut meeqqat atuarfiini ilinniarfinnilu tamani matuneqarput. Arto nittartagavoq sorpassuarnut atorneqartartoq; kikkunnilluunniit nittartagaliorfigineqarsinnaavoq, inuusuttuaqqat allakkasuaatitigut allaqattaarsinnaapput toqqaannartumillu oqaloqateqarsinnaallutik, artorsaateqarunillu Artomi nittartagaq aalajangersimasoq allaffigisinnaavaat il.il.
Inuusuttuaqqat nittartakkamik atuisarnerat Kalaallit Nunaanni Ilinniagaqarnermi Attaveqatigiiffimmut, Attammut, akisoorujussuuvoq.
- Internetimik atuinermut akiligassat 60 procentiisa 80 procentiisalu missaat meeqqat atuarfiinut ilinniarfinnullu Artop nittartagaanik atuinermut akilertarpavut, Inerisaavimmi pisortaq, Søren Porsbøl, oqarpoq, nangillunilu:
- Ukiup affaani siullermi missingersuutigut sinningaatsiarlugit internetip atorneqarneranut akiliivugut, qanoq iliortariaqarattalu aalajangerpugut Arto matuniarlutigu, Søren Porsbøl oqarpoq.
Kalaallit Nunaanni Ilinniagaqarnermi Attaveqatigiiffimmit meeqqat inuusuttuaqqallu ilisimasaqarluarnissaat kissaatigineqarpoq, taamaattorli Arto ilisimasaqalernissamut Attammit tulluussorinartinneqanngilaq. Inuusuttuaqqat nittartakkamik allamik Artotut ittumik atuilernissaat qulakkeerlugu oqaatigineqarsinnaanngilaq.
- Atuisut pissarsilluarniassammata internetimi nittartakkanik atuinermut akiligassat maanna aaqqiiffiginiarsaraagut. Meeqqat atuarfiinut ilinniartoqarfinnullu attaveqaativut pitsanngortissinnaassallugit neriuppugut. Meeqqat inuusuttuaqqallu pitsaanerpaamik ilinniagaqarnissaat Attammi anguniartuarparput, taamaattumik nittartagaq Arto annertuuliuutigisariaqanngikkaluarpoq, Søren Porsbøl naggasiivoq.
Nittartagaq Arto meeqqat atuarfiini ilinniartoqarfinnilu atorneqartassasutut aalajangertoqassagaluarpat, akiligassartaatatuarfiit ilinniartoqarfiillu namminneq akilertalissavaat.
