Arsakut siaruaannerat akisuvoq
Ullut kingulliit marluk ingerlaneranni timmisartuussinissat 30-t taamaatiinnarneqarput angalasussaagaluillu 700-t missarluinnaanittut eqqugaallutik.
Timmisartoqqusiunnaarneq Air Greelandip aningaasaqarneranut malunniullualereerpoq, Air Grenlandip aningaasarsiornermut pisortaa Christian Kjeldsen oqarpoq:
- Maannamut oqartoqarsinnaavoq 750.000 koruunit aningaasartuutigaavut, ullormullu aningaasartuutit suli alliartorput, Christian Kjeldsen oqarpoq.
Islandimi qaqqap Eylaflallajökullip siorna marsip qaammataani innermik aniatitsinera Air Greenlandimut 10 millionit koruunit missarluinnaanik annaasaqarfiuvoq.
Ulluni kinguillerni marlunni aningaasartuutit amerleqqinnissaat ernumanaatigineqarsinnaasoq missingersuutit takutippaat, tassami innermik anitsinerup qullaatitai Skandinaviamut siuariartulersimammata.
- Tusakkavut kingulliit malillugit Københavnip mittarfia suli matuneqanngilaq, maannamulli Danmarkip silaannartaata ilaa timmisartorfioqqusaajunnaarsimavoq. Timmisartuutileqatigiiffiillu tusakkavut allat tassa, innermik anitsinerup qullaatitai anngutinnginneranni, timmisartuussinerillu matunnginneranni, piffissaagallartillugulu timmisartumik angalanissat ilaat siuartinneqarsimapput, assersuutigalugu Savalimmiunut timmisartuussinerit matuneqannginnerini timmisartuussisoqareersimalluni, Christian Kjeldsen oqarpoq.
Nunatsinnut Danmarkimullu timmisartuussinerit unitsiinnaneqarnerisa saniatigut qulimiguulimmik timmisartuussinerit arlaqartut nunatsinni taamaatiinnartariaqartariaqarsimapput.