Arsakut aningaasarsiutaalluarput
Gustavsson arsakunik nittartakkakkut tuniniaasalersimasutut radioavisimi ungasissorsuunngitsukkut oqaluttuaraarput.
Paasinarsereerpoq arsakunik tuniniaaneq aningaasarsiutaalluarsinnaasoq.
Nittartagaq millionip affassaa taamanili iserfigereerpaat pisiniuttullu imaaginnavissimallutik.
Arsakut nunanut assigiinngitsunut maannamut 60-iusunut nassiussuisoqareerput, sulilu soqutiginnittoqaqaaq.
Nittartakkami nalunaarsuinerit takutippaat nunat 133-t arsakunik pisinissaminnik soqutiginnittut.
- Innermik anitsisartup qanitaani ataataga najugaqarami, arsakunik aallertuusarpoq. Qaqqaq innermik anitsilermalli eqqarsarsimavunga immaqa aningaasarsiuutaalluarsinnaasoq, sunaaffalumi, Sofus Gustavsson oqarpoq.
Arsakut igalaaminermik qipisakkamik matulikkanut poorlugit 160 grammikkaarlugit tuniniarneqarput. Poortat ataatsit islandip koruuninngorlugit 3.900-qarput, dollarinngorlugit 30 dollareqarlutik.
Innermik anitsisartup arsakuinik tuniniaaneq aningaasannanniutaannaanngilaq, aamma ikiuiniarnermut iluaqutaavoq. Tassami sinneqartoorutit tamarmik suliniaqatigiiffimmut Ice-Sar-imut tuttarput. Ice-Sar tassaavoq innermik anitsinerup kingunerisaanik isumannaallisaanermik, eqqiaanermik saliinermillu sulialik.