Arsaattartut unataasut eqqartuussaalerput
- Unnerluussissutip allannissaa amigaatigiinnarparput taannalu eqqartuussivimmut tunniutissavarput, Ilulissani politiini pisortaq Karl Vinther KNR-mut oqarpoq.
Ilulissani pissartanngorniuttoqareersoq erngulluni nangikkiaasuni arsaattartut pingasut unataasimasutut pasisaapput. Unatarneqartut ilaat qaamigut napparsimmavimmi mersortittariaqarsimavoq.
- Piffissami kingullermi politeeqarfimmi ulapaarsimaqaagut, suliatsinnili arsaattartut unataasut salliutillugit paasiniaaffigisimavagut, Karl Vinther oqarpoq.
Unataasoqarneraniit politiit ilisimaaraat arsaattartut sorliit pasisaanersut. Arsaattartut illoqarfinnit allaneersuupput taakkulu illoqarfigisaminni politiinit apersorneqareerput.
- Suliamut atatillugu tigummigallagaasoqanngilaq, Karl Vinther nassuiaavoq.