Arsaattartorsuaq Pelé qiammat

Brasiliami illoqarfik Rio de Janeiro 2016-imi OL-erfiussaaq, taamaalilluni Amerika kujalleq nunarsuarmi aasaanerani timersornermik unammiuaarfiulluni siullerpaamik OL-erfiussaaq. Kalaallit Nunaanni Timersoqatigiit Kattuffianni generalsekretæriusoq Københavnimi Bella Centerimi ataatsimeersuarfiusumi nutaarsiassaq takkummat najuuppoq.
Allattoq Mads Lynge
oktobarip 02-at 2009 17:05

Rio de Janeirop ajugaanera ualiartoq pingasunngulersoq tusarliunneqaannartoq Claus Nielsen oqaluupparput.

- Pikkunaqaaq, ajugaapput. Rio 2016-imi OL-erfiussaaq. Pavungarujussuaq pereerlutik massakkut aajukua qungujulasut anersaartorujuttullu. Misigisaq annerlutaaqaaq, Claus Nielsen oqaluttuarpoq.

Brasiliamiu arsaattartorsuaq Pele, eqqannguaminiittoq, nuannaarnerup pianik qiasoq aamma takusinnaavaa.

- Pele nuannaaqaaq, aajuna qiavoq. Taama qanitsigalugu misigisaq annertoqaaq. Ajorsartut ingerlaqqinngitsoortut maani aamma misigalugit malugalugillu assorsuaq nikallunganeq sakkortuvoq. Soorlu tassa timersorluni unamminermi finalimut immaqaluunniit semifinalimut ajorsarluni, taama misiginartorujussuuvoq. Taavali massakkut finalimi ajugaasoqarpoq, misigisaq tassa taannaavoq, Claus Nielsen oqarpoq.

Claus Nielsenip aamma oqaatigaa, Rio de Janeirop ajugaanera tusarliunneqaannartorli sambamik nipilersorpalaaq sumi tamaani tusarsaalersoq. Rio de Janeirop ajugaaneranik tuluttut oqalulluni saqqummiisuuvoq International Olympic Committeemi IOC-mi præsidenti Jacques Rogge.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq