Arsaanneq pillugu nunanit tamalaaneersut Nunatsinni isumasioqatigiinnissaat piareersarneqartoq

KAK Danmarkimilu arsaattartut kattuffiat KAK arsaanneq pillugu nunanit tamalaaneersut Nunatsinni aappaagu isumasioqatigiinnissaannik piareersaateqarput.

Tamanna angusat ilagivaat DBU-mi siulittaasup Jesper Møllerip aamma Hele Danmarks Klubhusip siulittaasuata Jens Due Olsenip tikeraarneranni ataatsimiinernilu Nuummi pisuni KAK-mi siulittaasoq Kenneth Kleist tikeraanut inororsaartuuvoq.

Piareersaatit aallartisarneqaleruttorput.

- Ima aallartisarnermiitsigaagut suliluunniit isummerfiginagu isumasioqatigiinneq Nuummi, Sisimiuni imaluunniit Ilulissani pissanersoq, KAK-mi siulittaasoq Kenneth Kleist KNR-imut oqarpoq.

- Inupparujussuit tikittussaapput. Taamaattumik sumiiffinni assiginngitsuni unnuiffiusinnaasut misissortussaavagut, Kenneth Kleist oqarpoq.

DBU-mi siulittaasoq Jesper Møller Europami arsaattartut kattuffissuanni UEFA-mi siulittaasumut tulliuvoq. Ukiunilu arlalinngortuni Nunatsinniit sulissutigineqarpoq arsaannermi nunat tamalaat kattuffissuanni ilaasortaalernissaq nunanilu tamalaani tapersersortissarsiorneq ingerlavoq.

- DBU nunarsuaq tamakkerlugu attaveqartuuvoq. Uagutsinnut aamma iluaquterujussuuvoq Jesper Møller UEFA-mi siulittaasumut tullersortaammat maannalu sulissutaavoq UEFAp præsidentiata Alexander Ceferinip Nunatsinnut tikeqataanissaa, Kenneth Kleist oqarpoq.

- Nunani tamalaani kattuffissuarmi ilaasortanngorniarnermi suliamik ingerlasoqarpoq. Suliaq taanna ingerlammat oqaaseqarfigisinnaanngikkallarpara, Kenneth Kleist oqarpoq.

Kulturimut timersornermullu naalakkersuisoq Nivi Olsen Danmarkimiit tikeraanik KAK-millu ataatsimeeqateqarnermi peqataavoq.