Arsaanneq: B-67 savalimmiormiunik kakkattunik suleqateqalerpoq
B-67 Nuummeersoq aamma KI Klaksvikimeersoq piukkunnaatilinni inerisaanermut suleqatigiilerput aammalu aqutsisut sungiusaasullu paarlaasseqatigiissinnaalerlutik.
KI sapaatip akunnerata naanerani kingullermi angutini 20-issaa pissartanngorpoq arnartaallu 22-issaat pissartanngoraluttuarlutik.
Allatut oqaatigalugu peqatigiiffik misilittagarpassuaqarpoq.
- Peqatigiiffiit akornitsinni pissanganartunik oqaloqatigiittarpugut assullu pissanganarpoq kalaallit sungiusaasut arsaattartullu ineriartortissinnaasanerivut tassani B-67-ip peqatigiiffia ilanngullugu, KI-mi inerisaanermut pisortaq Jonas Nielsen oqarpoq.
- Uagutsinnut annertoorujussuussaaq kalaallit piukkunnaatillit annertuunik misigisaqarsinnaassappata aammalu Klaksvik aqqutigalugu nunani tamalaani misiliisinnaassappata, Jonas Nielsen oqarpoq.
AAMMA ATUARUK Kosovomut unammineq tv-mi Facebookimiluunniit takuteqqusaanngitsoq
Savalimmiut Europami arsaattartut kattuffissuanni UEFA-mi ilaasortaapput taamalu EM-mut aamma VM-mut anngunniuttuni arsaateqataasarlutik.
UEFA-mi ilaasortaaneq aqqutigalugu Savalimmiuni peqatigiiffiit siuartuussut Europami peqatigiiffiit unammersuarnerini peqataasarput.
- Futsal Nunatsinni ineriartorluarpoq kisianni soorluuna silami arsaattarnermi ineriartorneq unikaallaqqasoq, B-67-mi siulersuisuni ilaasortaq Kenneth Kleist savalimmiormiunut isumaqatigiinniartuusoq oqarpoq.
- Kalaalit arsaattartut maanna sungiusariarlutik angalapput Iranimiunullu ajorsangaatsiartarlutik. Arsaattartuvut nunani tamalaani unamminissaannut piareersimanerulersissinnaavavut Klaksvikkimiunik suleqateqarnikkut, Kenneth Kleist oqarpoq.
Oqaatigisinnaanngikkallarpaai arsaattartut siulliit qaqugu Klaksvikkiliarumaarnersut.
Savalimmiormiut kissaatit aamma saqqummiussimavaat B-67 aamma arnanik Savalimmiuliartitsissasoq.