Arsaaffiit ivigaaraasat landskarsip akissaqartinngilai

Illoqarfinni anginerni ivigaaraasanik arsaaffiliornissaq Inatsisartuni amerlanerussuteqartut Siumup Demokraatillu tapersersortuarsinnarpaat, suli Atassut Inuit Ataqatigiillu akerliusut. Tamanna erserpoq Inatsisartut kulturimut, ilinniartitaanermut, ilisimatusarnermut ilageeqarnermullu ataatsimiititaliaata isumaliutissiissutaani saqqummiunneqarlaami.

Taamaakkaluartoq ivigaaraasanik arsaaffiliornissat qanoq aningaasalersorneqassanersut suli inissinngilaq. Ilimanarporli aningaasaliisussarsiornikkut tamanna naammassiniarneqassasoq.

- Isumaq ataatsimiititaliap soqutiginartippaa, pingaartumik nunatta karsiata maannakkut ukiunilu tulliuttuni unammilligassai annertuut isiginiarlugit, iliuusissanut nutaanut aningaasassaqarnissap naatsorsuutigineqarsinnaanera ilimagineqarsinnaanaviarani. Taamaattumik namminersortunit aningaasaliiffigineqarsinnaanera periarfissaqarnersoq missuiffigisariaqartoq, ataatsimiititaliaq isumaqarpoq, taama ataatsimiititaliaq isumaliutissiissummini allappoq.

Ilimagineqarpoq Nuummi, Sisimiuni Ilulissanilu ivigaaraasanik qallikkanik arsaaffiliornissat katillugit 15 millioner koruuninik akeqassasut. Arsaaffiit immikkut tamamik aserfallatsaaliornerat ukiumut 100.000 koruuninik akeqassasoq ilimagineqarpoq.

Siunnersuut Inatsisartuni aappassaanneerneqassaaq pingasunngorneq aprilip 13-at.