Arpalluni nunarsuarmik kaajallaaniaq Kalaallit Nunaannut aqqusaalerpoq
Rosie arpalluni kaajallaaniarnermi pingasorterutaa maannammut ingerlatereersimavaa.
Nappaatip kræftip ilisimasaqarnerunissaa anguniarlugu Rosie arpalluni nunarsuarmik kaajallaaniarpoq, aammalu uigigaluani kræftemik nappaateqarluni toqusoq eqqaaniarlugu.
Misigisaqarniarlunga arpappunga ingammik inuiaat issittumi najugaqartut eqqarsaatigalugit, Rosie Swale Pope allagaqarnermini taamatut allappoq.
Rosie Narsarsuarmut tikissaaq sisamanngornermi jannuaarip ulluisa 24-anni, Canadamiut Nalunami guldtisiortut timmisartuannut ilaalluni. Rosiep pilersaarutaa malillugu Nuummut aamma tikeraarniarpoq.
Maannamut 23.353 kilomeriterinik isorartussusilik Rosiep arpalluni ingerlavigereerpai. Tuluit Nunaanni Wales-imiit Sibiriap kangisissuanut Rosie arpalluni ingerlavigereerpai, tassanngaanniillu Alaskamiit Canadamut ingerlasimavoq, maannakkorluinnarlu Canadami Nova Scotiamiippoq. Rosie arpannermini qamutaasannguamik assakaasulimmik kalitaqarpoq, tassaniipput tupeq, sumiissusersiut GPS sattelitsilu atorlugu oqarasuaat.
Kalaallit Nunaat aqqusaareeruniuk Island-imut ingerlaqqinniarpoq, Islandilu itivinniarpaa, tassangaaniillu timmisartumut ilaalluni Skotlandiliarniarpoq Tuluillu Nunaat tamaat aqqusaarlugu appaniarpoq Wales-imi illoqarfimmi Tenby-mi angerlarsimaffimminut apuunnisami tungaanut.
