Arnat unnuarsiortartut iviangimikkut kræfteqalianerusarput

Sverigimi misissuinikkut qaammatit marluk matuma siornagut ingerlanneqartumi unnuarsiortarneq kræfteqalianermut pissutaanngitsutut oqaatigineqaraluarpoq – sunamita upperissavarput? Danmarkimi kræfti akiorniarlugu suleqatigiiffimmi Sullivinni Avatangiisit pillugit ilisimatooq, Johnny Hansen, aperineqarpoq.

Naalagaaffiit Peqatigiit Peqqinnissaq Pillugu Suleqatigiiffiata misissuinera nunani assigiinngitsuni, soorlu Danmarkimi, Norgimi USA-milu misissuisarnerit aallaavigalugit misissuinerugami tutsuiginarneruvoq, Sverigimili arnat 30-t kisiisa iviangimikkut kræfteqalersimasut misissugarisimavaat, massa Sverigimiinnaq ukiumut arnat 600-t missaaniittut iviangimikkut kræfteqalertartut. Misissuinerilli arfinillit, Danmarkimi, Norgimi USA-milu ingerlanneqarsimasut takutippaat unnuakkut sulisartut iviangimikkut kræfteqalianerusartut. Sulili naluarput sooq unnuarsiortarneq kræfteqalianerussutaasarnersoq. Misissueqqinnissani soorlu ukioq ataaseq unnuarsiortarsimagaanni iviangikkut kræfteqalianerussutaasarnersoq paasiniarneqassaaq, misissuereernerilli malillugit ilimanarneruvoq aatsaat sivisuumik unnuarsioqattaarneq kræfteqalianerussutaasartoq, misissueqqeqqaarlutali qanoq unnuarsiortarnerup kræfteqalianerussutaasarnera pinaveersaarneqarsinnaanersoq paasisinnaassavarput, Kræfti Akiorniarlugu Suleqatigiiffiup ataani Sullivinni Avatangiisit pillugit ilisimatooq, Johnny Hansen, oqarpoq.