Arnat ulluanni kommunimut qinersinissaq qitiutinneqassaaq
– Taamaattumik inuit kajumissaarpagut kommunimut qinigassanngortittut aperisaqqullugit naligiissitaaneq qanoq anguniassaneraat, Nuummi marsip arfineq-pingajuannut tunngatillugu sulissutiginneqataasut ilaat Inge Olsvig Brandt taama oqarpoq.
- Kommuninut qinigassanngortittut aperisarsigit arnat meeqqallu annersaanermit eqqugaasimasut sutigut ikiorumaneraat, kommunillu suliffiutaani naligiissumik ingerlatsinissaq qanoq anguniassamaarneraat, taama Sermitsiami ullumi saqqummersumi Inge Olsvig Brandt issuarneqarpoq.
Aqagu marsip arfineq-pingajuani arnat taakku Brugsenip silataani naapinneqarsinnaapput oqaloqatigineqarsinnaassallutillu. Ullorlu taanna kingusinnerusukkut arnat Katuap sioraaneerratissapput naligiissitaanerlu pillugu erinarsortoqarlunilu qitittoqassalluni.
Ullullu ingerlanerani Katuap iluani isiginnaartitsisoqassaaq aliikkusersuisoqarluni nipilersortoqarluni aammattaaq erinarsortartut Julie Berthelsen Kimmernaq Kielsen aammalu Nina Kreutzmann Jørgensen erinarsussapput.
