Arnat qulingiluat spiralilersuinermut suliami maannamut taarsiiffigineqareersut
Arnat qulingiluat, 1991 sioqqullugu spiralilerneqarsimasut naartunaveersaammilluunniit Depo-Proveralerneqarsimasut danskit naalagaaffiannit 300.000 koruuninik immikkut maanna taarsiiffigineqareerput.
Patienterstatningen KNR-imut paasissutissiivoq.
Inatsit, arnanut spiralilersorneqarsimasunut taarsiissuteqarnissamut periarfissiisoq, Folketingimi amerlanerussuteqarluartut sapaatit akunnerisa marluk matuma siorna akuersissutigaat.
Inummut ataatsimut 300.000 koruunit taarsiissutigineqarsinnaapput, taakkulu arnanut akuersissuteqaratik spiralimik Depo-Proveramilluunniit 1991 sioqqullugu naartunaveersaaserneqarsimasunut tunniunneqassallutik.
Danmarkip nunatsinni peqqinnissamik oqartussaaffik januaarip aallaqqaataat 1992 tikillugu akisussaaffigaa.
Arnat taarsiissuteqartoqarnissaanut juulip aallaqqaataannili qinnuteqarsinnaalerput.
Patienterstatningenip qinnuteqaatit 401-it maannamut tigoreerpai.
Patienterstatningenip tamatuma saniatigut arnanut eqqugaasimasunut taarsiissuteqartoqarnissaanut qinnuteqaasiornissamut ikiorneqarnissamik ilitsersuinissamillu periarfissiiniarluni nunatsinnut angalanissamut pilersaaruteqarpoq.
Angalaqatigiit nunatsinni arnanik naapitsissasut
Angalaqatigiit uku ilaapput immikkut siunnersorti Line Specht, tarnip pissusianik ilisimasalik Tone Frank, eqqartuussisuusimasoq Annette Hagdrup aamma oqalutsi Cecilie Uiloq Berthelsen.
Angalaqatigiit septembarip 29-anni Ilulissaniissapput. Tamatuma kingorna Uummannamut, Aasiannut, Qeqertarsuarmut, Qasigiannguanut, Maniitsumut Nuummullu angalassapput.
Line Specht aamma Tone Frank arnanut saqqummiissapput.
- Angalalluta saqqummiinissarput pillugu maniguunnartorujussuuvoq. Nalunaarutigineqartut maannamut atuakkakka sunniuteqangaatsiarput.
- Kalaallit Nunaata Danmarkillu akornanni ataqatigiinneq pillugu politikkikkut oqallinneq sakkortungaatsiarsimavoq, kisianni arnanut ikiullutalu ilitsersuiartussaagut. Tamarmi taakkununnga tunngassuteqarpoq, Line Specht oqarpoq.
Angalaqatigiit aatsaat aappaagu upernaakkut nunatsinnukaqqinnissartik pilersaarutigaat. Tassani tunumut, nunatta kitaanut kujataanullu angalasoqassaaq.
Patienterstatningen Danmarkimi oqartussat ataanniippoq, tassani napparsimasut danskit peqqinnissaqarfiini ajoquserneqarsimagaata taarsiissuteqassanersoq aalajangerneqartarpoq. Patienterstatningenip arnanit spiralilerneqarsimasunit taarsiissutinik isumaginninnissaq aamma akisussaaffigaa.
