Muuamaamik upperisallit siuttuat Australiami najugalik – tusaamanerlunneqangaatsiartoq – Mufti saalaassavarput.
Arnat isitik kisiisa minillugit atisalersorsimanngikkaangamik pinngitsaalineqarlutik atoqatigineqartarnertik pisuussutigisaraat Mufti oqarsimavoq.
Sydneymi muuamaamik upperisallit kattuffiata Mufti qaammatini arlalinni nipangersimanissaanik naalakkerpaa:
64-inik ukiullip Muftip muuamaamik upperisaqaqatini sapaatip-akunneri arlallit matuma siorna tallimanngornermi qinoqatigalugit oqaluussinermini arnat tamataqarpiarneq ajorlutik angutinik pilerigeqqusaartarnerat pillugu ima oqarpoq:
- Neqi silamut ilisat qitsummik nerineqarsimappat, tamanna kia pisuussutigissavaa? Qitsuup imaluunniit neqip ?
Muftip oqaasii Tuluit Nunaannut ippassaq aatsaat anngupput. Anngummata Mufti arlalinnit tunuaqquneqarpoq. Muftili tunuarnissaminik pilersaaruteqanngillunnarpoq.
Mufti ullumi tallimanngornermi qinoqatigiittuni peqataareerluni oqaluffimmit animmat tusagassiortut ussallutik aperimmanni ima oqarpoq:
- Amerikami præsidentip najugaqarfia piuneeruppat tunuassaanga, Mufti oqarpoq. Taamaatut oqarmat tusaasut ima qisuariarput:
Australiami ministeriuneq muuamaamik upperisallit aalajangigassaannut akuliukkusunngilaq, taamaattorli Australiami innuttaasut eqqugaasinnaanerat mianersoqqussutigaa.
- Australiami muuamaamik upperisallit ima oqarfigerusuppakka: maannangaaq aaqqiinngikkussi ilissi innuttaasut sinnerinit isiginerluuteqaatigilersinnaavarsi. Tamannalu ajussaqaaq, Australiami ministeriuneq oqarpoq.
Australiami muuamaamik upperisallit Mufti qaammatini pingasuni oqalugiaqqujunnaarallarpaat.