Arnat marluk takornarianik piniartitsisartutut pikkorissarput

Aappaa Marlene Nielsen uini piniartutut inuussutissarsiulik Amaasa Olsen peqatigalugu umimmaap tullullu neqaanik nunatsinnut avammullu tuniniaanermik ullumikkut ingerlatsipput. - Tammajuitsussarsiniartitsinerli aallutarilerusuppaat, Marlene Nielsen oqarpoq.

- Uanga pisarsiaqartorujussuussaanga, Amaasa kursusereerami qanga, kisianni aamma piniartuulluni. Uanga inatsisikujuit assigiinngitsut soqutigineruakka, oqarpoq.

Aamma pisarisartakkamik amiisa qanoq tammajuitsussarsiornermi suliarineqartarnissaat ilikkarusuppaa.

-Piniaraangatta amiiaraangatsigit allatut pisarpagut. Maannakkut ilikkagassaraara qanoq konserveringimut (aanaveersaasarfimmut) nassiutsinnagu ameq qanoq suliarineqassanersoq. Pinngitsoornanga aamma licenseqartariaqarama, Marlene Nielsen oqarpoq.

Pikkorissaqataasut aamma ataqatigiinnerulersinnaanissaat neriuutigaa.

- Aap, oqaloqatigiinnikkut siunertat suunersut paasineqarsinnaapput. Nunatsinni aamma kiatsikkiartuaarpoq. Piniarfiit suut periarfissaappat? Takornariat nunatsinni aamma amerliartorput. Atorluarlugu uagut ”minnerulluta” nittarsaassilluarsinnaagatta, erseqqissaavoq.

Marlene Nielsen aamma isumaqarpoq nunatsinni angallassisartutut guide-tut sulisut qallunaaginnaavallaartut.

- Aappi, isumaga malillugu aap. Guide-rpassuit takusarpavut qallunaajunerusut kalaalitaqarpiaratik. Kisianni aamma aappaatigut aamma apeqquserneqarsinnaagami, immaqa kalaaleq qinnuteqarneq ajorami, Marlene Nielsen oqarpoq.

Marlene Nielsen Kangerlussuarmiittoq aamma oqarpoq Afrikamut tammajuitsussarsiorluni piniartitsisartoq Danmarkimiittoq nunatsinnukartitsisalerniartoq attaveqarfigilereersimagitsik.