Arnat marluk Marokkomi qaqqami toqusimasut nassaarineqartut
Tamanna pisortatigoortumik uppernarsartinniarlugu Marokkomi qallunaat norskillu aallartitaqarfii sulissuteqarput.
- Qaqqaq nassaarfiusoq tikikkuminaatsorujussuuvoq taamaattumik paasiniaanermi suliaq ajunakusoorpoq, Danmarkimilu politiit pisoq pillugu ilaqutaasut ilisimatereeraat, nunamut namminermut ministereqarfik nalunaarpoq.
Marokkumi nunamut namminermut ministereqarfiup AP-mut nalunaarutaa naapertorlugu arnat marluk takornariaasut ataasinngornermi ullaakkut toqungasut nassaarineqarsimasut, dr.dk allaaserisaqarpoq.
Arnat nassaarineqartut nakuuserfigineqarsimasutut isikkoqarsimapput tamannalu misissuiffigineqalerluni.
Arnat pineqartut nunap immikkoortuani El Haouzimi qaqqarsuup Toubkalip killingani illoqarfimmit Imlilimit kilometerinik qulinik ungatsigisumi nassaarineqarput.
Qaqqarsuaq Toubkal meterinik 4167-inik portutigivoq Afrikallu avannaata portunerpaaffigalugu, taamaattumillu takorniarianit ornigarluarneqartarluni.
Oqartussat susassaqartut pisoq pinerluttuliornertut oqaatigisartik paasiniaaffigalugu aallartereerpaat.