Arnat kinguaassiuutitigut atornerluisartut
Kinguaassiuutitigut atornerluisartut tassaanerusarput anaanat, Norgimi angutit kinguaassiuutitigut atornerlunneqarsimasut saaffiginnittarfianni aqutsisoq Endre Førlund netaviisimut oqarpoq.
Angutit kinguaassiuutitigut atornerlunneqarsimallutik saaffiginnittarfimmut siorna saaffiginnissimasut sisamararterutaat sinnerlugit arnanit atornerlunneqarsimasut, netaviisimi allaaserineqarpoq.
Arnat kinguaassiuutitigut atornerluisarnerat paquminartorujussuartut isigineqartillugu ajornartorsiut anigorneqarsinnaanngilaq.
- Arnat kinguaassiuutitigut atornerluisarnerat inuiaqatigiinni oqaluuserineqanngippat atornerluiuassapput, Endre Førlund oqarpoq.
Angutit kinguaassiuutitigut atornerluigaangamik imminnut iluarusutsinnissartik anguniartarpaat.
Arnalli kinguaassiuutitigut atornerluinerminni, atornerlutartik tarnikkut annertuumik innarlertaraat, Norgimi angutit kinguaassiuutitigut atornerlunneqarsimasut saaffigiinnittarfianni aqutsisoq oqarpoq.
Timikkut innarlerneqartoq tilluusanikkaangat takuneqarsinnaajuaannarpoq, anaanaasulli atornerluinera anaanatut pissusilersorneratigut toqqorterneqartoq iliuuseqarfigiuminaappoq.
