Arnat atugaannik sorsuutiginnittoq aningaasanik ikuallaasoq

Arnat angutillu akissarsiatigut naligiinnerulernissaat aningaasarpassuarnik ikuallaanermigut takutinniarpaa.

Ataasiakkaarlugit qisuttuutigigamigit svenskit aningaasaat 100.000 koruunitsiarsuit assiliisut saavanni ikuallaratannguarpai. Svenskit naalakkersuinermik suliallit, soqutigisaqaqatigiit allallu naalakkersuineq pillugu oqallikkiarlutik ukiup taamaalinerani Almadalimi katersuunneranni taanna pivoq.

Gudrun Schymanip aningaasat taama amerlatigisut ikuallakkamigit soorunami ingasagigaluarpaa.

- Soorunami ingasattajaarneruvoq ajorsitsaarinerullunilu, 100.000 koruunimmi amerlaqaat, aatsaalli tassa saasaarut pitsak, Gudrun Schyman politikenimut oqarpoq.

Arnaq 62-inik ukiulik arnat partiianni Feministisk Initiativimi siuttunut ilaavoq, taakkualu ukiaru septembarimi Sverigemi inatsisartunut qinersinissamut assigiimmik akissarsiaqalernissaq qineqqusaarutaasa ilagaat.

Partii taanna isumaqarpoq Sverigemi arnat qaammammut 4700 koruuninik angutinit qaammammut akissarsiakinnerusut. Gudrun Schyman isumaqarpoq tamanna svenskit arnartaannik aaqqissuussamik immikkoortitsinerusoq. Aningaasalli ikuallallugit taassuma iluaqutaasoraa, tassa taakku svenskit koruunii 100.000 koruunit qallunaat koruuninngorlugit 77.000 koruunit missaaniittut.

- Aviisimi annonceliiginnarsimagaanni allaanerujussuussagaluarpoq, tamannami eqqarsaatigigaluarparput, kisianni 100.000 koruunimut annonci angivallaanngitsuusariaqassaaq, Gudrun Schyman naggasiivoq.