Arnat angutillu naligiissitaanerunissaat anguniarlugu, ikiut tamaasa marsip aallaqqaataa nallertinnagu suliffeqarfiit qulit sinnerlugit sulisullit arnat angutillu amerlassutsimikkut qanoq agguataarneqarsimanerat pisortanut nalunaarutigisartussaavaat. Inatsillu taanna 2003-mi inatsisartut upernaakkut ataatsimiinneranni aalajangiunneqarpoq.
Inatsisartuni ilaasortap Asii Chemnitz Narup-ip maanna Naalakkersuisunut apeqqutigaa inatsit taanna malinneqarnersoq. Ujarliutit atorlugit inatsisip malinneqarneranik nammineq ujartuisimagaluarpoq nassaarsimananili.
- Inatsisiliorutta soorunami malittussaavarput minnerunngitsumik naalakkersuisut aalajangersimasumik suliakkerneqarsimappata inatsit tunngavigalugu tamatumalu naammassinissaa pingaaruteqartorujussuuvoq, Asii Chemnitz Narup oqarpoq.
Taanna isumaqarpoq arnat angutillu naligiissitaanissaat pillugu oqalugiaqattaarnerni nalliuttorsiornerni taamaallaat eqqaaneqartassappat iluaqutaassasorinngilaa.
- Eqqaamalluarpara inatsisissatut akuerineqarmat iluarisimaarneqaqisoq aamma oqartoqarpoq najoqqutassiisoqassasoq assigiikannersumik apuuttarniassammata, oqarpoq.
Asii Chemitz Narup aperaarput ukiut taakku pingasut ingerlaneranni nammineerluni aamma naalakkersuisooqataasimanermini naalakkersuisooqatini eqqaasittarsimannginnerai.
- Eqqartornikuuarput, eqqaamavara 2004-mi ilisimatinneqarpugut najoqqutassat taakkua piareersarlugit aallartittoqarsimasoq, kingorna naluara sumut ikkarlittoqarsimassagaluarnersoq, akivoq.
Inatsimmut soqutiginninngippallaartoqarsimanera paasiuminaatsinnerarpaa.
- Allatut paasisinnaanngilara arnat angutillu naligiissitaanissaat nunatsinni naalakkersuinikkut sulinermi pingaartinneqanngitsoq, taama oqarpoq Asii Chemnitz Narup.