Arnat aaqalernermi tajaqartarnissaat piumasarineqarpoq
Suliffeqarfiit akornanni ”ingasattajaartunik maleruagassaqarnera” ersersinniarlugu nalunaarusiaq sulisartut kattuffiannit suliarineqarpoq.
Sulisut perusuersartarfimmukartarnerat appartinniarlugu taamatut aaqqiisoqarsimanera ingasaassilluni naammassisaqarusussusermut ersiutaasoq, nalunaarusiami uppernarsineqarpoq. Icenews.is taama allaaserisaqarpoq.
Kortit kinaassutsimut uppernarsaatit perusuersartarfiliarnermi atorneqartalernissaat aqutsisut 66 procentiisa akornanni piumasarineqarsimavoq. Taamatuttaaq perusuersartarfiliarnermi atsioqqaartarnissaq piumasarineqartunut aamma ilaalluni.
Piumasarineqartullu ingasannersaat suliffeqarfiit ilaanni saqqummiunneqarsimavoq, tassani arnat aaqarnermi nalaani aappaluttumik tajaqartalernissaat aqutsisut ilaannit piumasarineqarsimalluni, tamannalu perusuersariartukulanermut utoqqatsissutaasussatut siunertarineqarsimalluni.
Nalunaaruusiaq Norgimi atuisartut ombudsmanniannut Bjørn Erik Thonimut tunniunneqareerpoq.
Suliffeqarfik sorleq aaqarnermi tajaqartarnissamik eqqussisimanersoq nalunaarusiami oqaatigineqanngilaq.
- Sulisunik nakkutiginninneq ingasattajaamik pisartoq taamaasilluni uppernarsineqarpoq, Bjørn Erik Thon oqarpoq.
Aaqalernermi tajanik atueqqusineq innimiilliornerusoq pineqartunullu narrutsatsitsisinnaasoq Norgimi atuisartut ombudsmanniat isumaqarpoq.
- Neriuppunga tamanna Norgimi suliffeqarfiit akornanni nalinginnaasumik atugaassanngitsoq, ombudsmanni oqarpoq.