Arnaq utoqqaq Nuummi ujajaaniarfigineqarpoq

Arnap utoqqap Nuummi illoqarfiup ilaani Nuussuarmi Nuniaffimmi angerlarsimaffia tallimanngornerup arfininngornerullu akornanni angutinit marlunnit unnuakkut nalunaaqutaq marluk missaani iserfigineqarpoq, arnarlu nakuuserfigineqarluni. Nuummi Politiit takunnissimasinnaasunik ujaasipput.
Assi © : KNR
Allattoq Mads Lynge, Anton Gundersen Lihn
januaarip 14-at 2018 11:32

Angutit angerlarsimaffimmut isertut Nuummiorpalullutik oqaluttut ujajaaniarsimapput, arnarlu nakuuserfigineqarluni.

Sermersuumi Politiit Nuummi Politeeqarfiat tusagassiutinut taama nalunaaruteqarput.

Politiit paasiniaanerminnut atatillugu ilisimannittunik Nuniaffimmi blokkit sungaartut eqqaaniissimasunik takunnissimasinnaasunik, tallimanngornerullu arfininngornerullu akornanni unnuakkut nalunaaqutaq ataatsip pingasullu akornanni tusaasaqarsimasinnaasunik attavigineqarnissaminnut kissaateqarput.

Arnaq nakuuserfigineqartoq Dronning Ingridip Napparsimmavissuanut uninngatinneqarpoq, nakorsanillu passunneqaleruttorluni.


Johan Westen, Nuummi Politiini pigaartuuneq KNR-imut oqarpoq nakuuserneq sakkortusimaqisoq, pisorlu paasiniaaffigineqaleruttoq.

- Nakuuserneq sakkortusimaqaaq, arnarlu peruluppoq, inuunerali navianartorsiunngilaq. Johan Westen, Nuummi Politiinit pigaartuuneq KNR-imut taama ilisimatitsivoq.

 

Nuummi Politiit oqarasuaataasa normoraat 70 14 48.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq