Arnaq toqutaasimagunarpoq
Sapaammi december-ip aappaani ullaassakkut nalunaaqutaq 05:00ip aamma 06:00ip akornanni Tasiilami imerniartarfiup ”Klubbip” silaataani arnaq 63-inik ukiulik toqungasoq nassaarineqarpoq. Arnaq kiinnamigut annertuunik ikeqarpoq, politiillu naatsorsuutigaat arnaq pinerlineqarnermi kingorna toqusimanissaa, Tasiilami politiit nalunaarput.
Politiit suli paasiniaapput maannalu paasiniaanerminni innuttaasut ikiortiseraat.
- Inuit pisimasumut taassumunnga, tassa nal. 06:00 sioqqullugu takusaqarsimasinnaasut imaluunnit tusagaqarsimasinnaasut, eqqumiigisaminnilluunnit malussarsimasinnaasut Tasiilami Politiinut saaffiginneqquneqarput oqarsuaammut 98 14 48-mut, Tasiilami politeeqarfimmi ulluinnarni aqutsisoq Mathæus Larsen nalunaarpoq.