Arnaq savilersortoq tigummigallarneqarpoq
Nuup ilaani Kongevejimi blok B-mi savilersorneq pivoq. Arnaq angullu fiisternerup nalaani oqqatilersimapput, taannalu pissutaasimagunarluni arnap angut saassussimagaa, Nuummi politiit ilisimatitsissutigaat.
Arnaq pasineqartoq Nuup Eqqartuussiviani sapaatiummat killisiorneqarmat, sapaatip-akunnerini marlunni tigummigallarneqarnissaa aalajangiunneqarpoq. Taamaakkaluartoq savilersornermut atatillugu takunnittuusut eqqartuussineq sioqqullugu arnap sunnerniannginniassammagit 64-inik ukiullip tigummigallarneqarnissaa aalajangiunneqartoq politiit erseqqissaatigaat.
Illersuisuatali tigummigallarneqarnissaanik aalajangiineq allanngorteqqullugu Nunatta Eqqartuussivianut ingerlateqqippaa, arnap eqqartussinissap tungaanut iperagaanissaa piumasaralugu. Taamaammat arnap tigummigallarneqaannarnissaanik iperagaanissaanilluunniit Nunatta Eqqartuussiviata aalajangernissaa maanna utaqqineqartoq, politiit oqaatigaat.