Arnaq putukkut nakkarluni qitiiarpoq

Nuummi inissiarsuit ilaanni, blok P-mi majuartarfitsigut nakkarnermi kingunerisaanik arnap inuusuttup qitini napisimavaa. Majuartarfinni putu asserneqarsimagaluarpoq – assiutaali peerneqarsimallutik. Tamanna politiinut nalunaarutigineqareerpoq.

- Matumani pineqarput sallilikkat issusuut qulit 20 gange 150 centimeterinik annertussusillit – piiarnerinilu sannatit atorneqarsimapput, Nuummi politiit pisortaat Bent Heiselberg oqarpoq.

Sallilikkat issusuut ataasinngornerup marlunngornerullu unnuaani piiarneqarsimapput – tamanna pisimassalluni unnuami ataatsip aamma marlunngornermi ullaakkut nalunaaqutaq arfineq-pingasut akornanni.

Politiit pasinartunik ilisimasaqanngillat – erseqqissarluguli aserorterineq nalinginnaasoq pineqanngimmat.

- Sallilikkat issusuut piiarniarnerat suliassaangaatsiarpoq imaaliallaannarlu pisinnaanani, Bent Heiselberg oqarpoq. Politiit ilisimannittunik ataasinngornerup marlunngornerullu unnuaani blok P-p eqqaani takusaqarsimasinnaasunit tusagaqarusupput.

Arnaq qitini napisimasoq suliaritikkiartorlugu Danmarkiliaanneqassaaq.