Arnaq peqquserluuteqaqattaarnermut unnerluutigineqartoq
Arnap Nuummeersup neqineq peqquserluuteqartutut, hashimik anngiortumik eqqussuisutut peqquserluttuliortutullu unnerluutigineqarnera pissutsini aqqaneq-marlunni unnerluutigineqarnerisa ilagaat, taakkulu pillugit Sermersuup eqqartuussiviani septembarip qulinganni eqqartuussaassaaq.
Arnaq pissutsini aqqaneq-marlunni unnerluutigineqarpoq. Ilaatigullu hashimik 312 grammimik Danmarkimiit nunatsinnut anngiortumik eqqusseriaraluarluni nassatamini toqqorsisimanini unnerluussaassutigaa.
Aammattaaq Facebookikkut neqinik tuniniaanermi pisuni arlalinni unnerluutigineqarpoq. Unnerluussisussaatitaasut naapertorlugit arnap aqissit, raajat, tuttut mattaallu tusindilinnik naleqartut Facebookikkut tunisimavai. Naalli pisisut akiliutaat tigusimagaluarlugit tunisai pisumik tiguneqanngisaannartut, unnerluussummi allassimavoq.
Arnat pissutsini arlalinni tillissimasutut aamma unnerluutigineqarpoq. Arnap oqarasuaatit angallattakkat marluk puisip amianit nasaliaq, aningaasat aggorsimasut aningaasaasivimmiillu 600 koruunit tikillugit tillissimagai allasimavoq.
Unnerluussisussaatitaasut arnap qaammatini pingasuni pineqaatinnissinneqarsimasunut inissiisarfimmiitinneqarnissaa taarsiissuteqaqquneqarnissaalu piumasaraat.
Arnap illersuisua, Poul Kreutzmann naapertorlugu arnap unnerluutigineqartunit aqqaneq-marlunnit aqqanillit pisuussutiginerarpai. Pisorlu kingulleq pisooqataaffigineraraa, illersuisuata oqaatigaa.