Arnaq naalagaaffiup eqqartuussisuuneratut inassutigineqarpoq
Elena Kagan imaannaanngitsunik allagartaqarpoq eqqartuussisuumananili, DR-ip USA-mi ilanngutassiortua oqaluttuarpoq.
Arnaq taanna inatsisilerituujuvoq ataqqineqartoq ullumikkullu solicitor generalimik taaneqartarluni, tassa Amerikami inatsisinik atortitsinermut ministereqarfimmi inatsisileritooq, Højesterettimi naalagaaffiup suliassaataanik tamanik isumaginnittoq, tassalu USA-mi atorfiit pissarsiarineqarsinnaasut qaffasinnersaasa ilaannik.
Harvadimi ilisimatusarfimmi arnani siullersaalluni pisortaavoq, naalagaaffimmi ingerlatsinermik ilinniartitsisuulluni, taamaalillunilu tupinnaannartumik allagartarissaarluni kikkullu tamarmik pikkorissusia ataqqillugu.
Republikanerit akuerissaneraat Steffen Gram aperineqarami akivoq:
- Siorna solicitor generalitut senatimit akuerisaavoq, 61-init akerlerineqarluni 31-nillu akuerineqarluni, Republikanerillu arfineq-marluk akuerisimallugu. Naalagaaffimmi eqqartuussisuunertut sulineq soorunami allaavoq aammalu piumasaqaatit imaannaanngitsut piumasaqaatigineqartassallutik. Nalunngilarput Republikanerit suna pigaat, tassalu sooq taassuma sakkutooqarneq inerteqqutaalersinniarneranut peqataasimanersoq, soorlu assersuutigalugu inuit Harvard Universityminngaanneersut sakkutuuni atorfinitsittarnerisigut, kisiannili taama oqaraanni taava eqqaamaneqassaaq arnap Sonjo Soto Majorip siorna toqqarneqarnera. Taanna ilaatigut ammip qalipaataanik immikkoortitsisutut oqalorujuunneqartarpoq, taamaattorli akuerineqarluni, amerlanerpaalli Elena Kaganip naggataatigut akuerineqannginnissaa upperinngilaat.
