Arnaq kalaaleq World Cupimut annguppoq

Nutartigaq 13:00

Sapaatiummat unamminermi angusarissaagaarami, 21-nik ukiulik, Niviaq Chemnitz Berthelsen, World Cup-imut annguppoq.

Niviaq Chemnitz Berthelsen Norge-mi najugaqartoq, Danmarki sinnerlugu World Cup-imut peqataassaaq, unaammissutigissallugu 10 kilometerimut ujakkaarneq.

Sapaatip akunnerata naanerani uani, World Cup-i Sverige-mi Gällivare-mi ingerlanneqassaaq.

Sisoraatinik ujakkaartartoq kalaaleq World Cupimut annguppoq, tassalu Kalaallit Nunaata oqaluttuarisaanerani kalaallini siullersaalluni unammersuarnissamut tassunga anngulluni.

Niviaq Chemnitz Berthelsen 21-nik ukiulik, Finlandimi unamminermi ajungaasumit 3 minuttinik kingulliulaaginnarluni apuukkami World Cupimut annguppoq:

- Sinnattorisartagara kiisami pivusunngorpoq, Niviaq Chemnitz Berthelsen KNR imut oqaluttuarpoq:

- Qangali takorloortarpara pitsaanerpaat unammisalernissaat.

Niviaq Chemnitz Berthelsen tulluusimaaqisoq taama oqarpoq.

Norgemi illoqarfimmi, Storslettep sisorarnermut ilinniarnertuunngorniarfiani, Niviaq Chemnitz Berthelsen kalaallit inuusuttut allat tallimat peqatigalugit atuartuuvoq. Ukiuni kingullerni sungiusartarnini sukataarunnerulersimagaa, Kalaallit Nunaani Sisorartartut kattuffianni ujakkaartartunut tunngasunut aatsimiisitap siulittaasua, Ole Lynge Hansen oqarpoq. Niviaq Chemnitz Berthelsen ullormut sisamariarluni sungiusartarsimavoq.

Sapaatiummat World Cupimut anngunniunnermi sukkaniuffik aatsaat ingerlaarfiginngilaa:

- Sapaatiummat ingerlalluartorujussuuvunga, aamma sukkaniuffipput nalunngilluariarakku, tassami tassani sungiusartarnikuugatta, tamanna iluaqutaasimassaaq.

Niviaq Chemnitz Berthelsen oqarpoq.

Sverigemi illoqarfimmi Gällivaremi World Cup aqagu ingerlanneqartussaavoq. Niviaq Chemnitz Berthelsen unammeqataanissaminut pissagaqaaq:

- Aatsaat World Cupimut peqataasussaagama naluara qanoq ingerlaarluartigissanerlunga.

Niviaq Chemnitz Berthelsen KNR-ip aperaa unammisaqattaarnerni unnamminerit sorliit anguniassallugit pingaartinnerpaanerai, akivorlu:

- VM aamm OL anguniarlugit eqqarsaateqarpunga.

2009-mi Kommuneqarfik Sermersuumi timersullaqqinnerpaatut Niviaq Chemnitz Berthelsen toqqarneqarpoq aammalu ukioq taanna, tassa siorna nunarsuatsinni sisoraatinik oqilaniunnerit artornarnerpaartaanni, Arctic Circle Race-mi ajugaasuulluni.