Arnaq franskeq kalaallisuunik nuannarinnittoq

Ullorsiornissalli kisimi allamiut tikisittanngilai, tassami kalaallisuugut aamma nunani allanit soqutigineqarlutik tikisitsisunut ilaapput. Kalaallisuunik soqutiginnilluni tikittut ilagaat Amilié Deschamps Frankrigemiu, taanna oqarpoq:

- Isumaqaraluarama Kalaallit Nunaat Danmarkimut atammat danskit kalaallit pillugit ilisimasaqarnerussasut, kisiannili taamaanngilaq. Taamaammat uanga nammineerlunga tikikkusulerpunga, nammineerlunga isinnit pissutsit piviusut takujumallugit, taama oqarpoq Franskeq Designereq Amélie.

Amélie aaliangersimavoq kalaallisuuliornermik ilikkagaqarusulluni, taamaalillunilu nunatsinnukarsimalluni. Maannakkullu Kittani Nuummiittumi avittarnermut ilinniarluni.

- Kittaniinninni assut naammagittarsinnaaneq misilittaaffigaara, tassami avittartassagaanni naammagittartuusinnaasariaqarmat. Aamma maaniinninni paasivara kalaallisuut qanoq kalaallinut pingaaruteqartiginersut, tamannalu assut ataqqivara.

Améliep nunasiaateqartarneq ilisimalluarpaa, tassami Frankrige Danmarkimiit nunasiaateqarnerup tungaatigut pitsaanerunngimmat. Taassuma oqaatigaa Frankrigip nunasiaatigisimasaat kingunerlutitseqisut, taamaattumik nuannaarutiginerarpaa maanna kalaallit nunasiaataasimanermit ungasilliartormata, naak ernumanartoqartilaaraluarlugu.

- Tassami nunap pisuussutaanik soqutigisallit Kalaallit Nunaat arajutsisimanngilaat tamakkualu ajunngittussaannarmik eqqarsartanngimmata, Améliep Kalaallit sillimmartaaqquai.