Arnaq arsarnermut sungiusaatut pikkorissaqataasoq
Nuummeersoq, Mona Korneliussen, meeqqanut inuusuttuaqqanullu isikkamik arsarnermik sungiusaasut tunngaviusumik pikkorissartinneqarmata arnartatuaalluni pikkorissaqataavoq.
Sungiusaasunut pikkorissaasuuvoq DBU-meersoq Jens Peter Hansen. Jens Peter Hansen isikkamik arsaattartunut sungiusaasutut misilittagaqarluarpoq. Ilaatigummi AAB’p superligami arsaattartuinut ikiortitut sungiusaasuusarnikuuvoq, arlaleriarlunilu aamma AAB’p U19/U17-iisa ligaholdiani sungiusaasuunerusarsimalluni.
GBU ilanngullugu allappoq pikkorissaqataasut tamarmik piumassuseqarlutik soqutiginnissimasut. Taamaammat GBU-mit neriuutigineqarpoq isikkamik arsarnermut sungiusaasut ilisimasatik piginnaasatillu meeqqanut inuusuttuaqqanullu iluaqutissanngorlugit ingerlateqqikkumaaraat.
GBU-mit Mona Korneliussen, arnat allat siornatigut pikkorissaqataasarsimasut assigalugit, soqutiginnilluarsimammat nuannarinerpoq:
- Arnat allat, GBU’p sungiusaasutut pikkorissartittarsimasai assigalugit, soqutiginnilluarpoq, ilisimasaqarluni angutillu pikkorissarneqartut assigalugit piumassuseqarluarluni, GBU tusagassiuutinut nalunaarummini allappoq.
Taamaammat GBU-mit neriuutigineqarpoq arnat amerlanerit isikkamik arsartartunut sungiusaasussatut akisussaaffimmik aamma tiguserusulissasut.
Kenneth Kleist, Ole Martinsen aamm David Janussen isikkamik arsarnermut tunngaviusumik sungiusaasutut pikkorissarneqarnertik naammassivaat, taakkualu inuusuttunut inersimasunullu sungiusaasutut pikkorissarnissamut aamma qinnuteqarsinnaalerput.
