Arnap tuluup Afghanistanimi toqutaanera tupaallaatigaat

Arnaq tuluk ikiuartortitaq Afghanistanimi tiguarneqarsimasoq amerikamiunit annaanniarneqartillugu Talibaninit toqunneqartoq ippassaani oqaluttuarineqarpoq.

Amerikamiut annaassiniartut tuluk tiguarneqarsimasoq Linda Norgroove toquttoorsimagaat, tuluit ministeriunerata David Cameronip ullumi nassuerutigaa.

Tupigusunnermik tupannermillu Londonimi inuit nutaarsiassamut qisuariaateqarput. Tuluit tusagassiortuisa qanoq sapiitsuliorlutik arnamik annaassiniartoqarnera ulluni kingullerni sammingaatsiarsimavaat, maannakkullu paasivarput illuatungeqqinnaanik pisoqarsimasoq. Taamaattumik inuit tamanna tupaatigisorujussuuvaat.

Taama pisoqarnera paasinarluartumik naalakkersuisunut iluaqutaanngilaq, innuttaasut 70 procentiisa missaasa tuluit sakkuttui sukkanerpaamik Afghanistanimiit angerlatinnissaat kissaatigereerpaat.

Taamaammat David Cameron suli suliassaqarneruliinnarpoq.

Ajoraluartumik siullermeerluni iligisamit aatsaat toqutaasoqalinngilaq. Pisoq tassaavoq, ikiuiartortitaq tuluk ilillu amerikamiut kukkorujussuarsimasut, iluamik susoqarsimanersoq suli naluarput. Taama pisoqarnera tuluit innuttaasa sinnerisa sorsunnerup suli iluaqutaaneranik qularunnaarsinnissaannut ajornarnerulersitsivoq.

Amerikamiut sakkutuuisa piaarinaatsoornikkut Linda Norgroove toqummassuk tuluit amerikamiullu suleqatigiinnerannut toqqaannartumik sunniuteqarnavianngilaq, ulluinnarnili suleqatigiinnerannut sunniuteqassasoq ilimanarpoq.

Qanoq ililluni taama pisoqarsimasinnaanera tuluit sakkutuuisa tupigusuutigigaat Afghanistanimit tusarparput.

Apeqqutissarpassuaqarporlu, sooruna tuluit sakkutuui immikkut sungiusakkat annaassiniartinneqanngitsut? Tuluimmigooq sakkutuui immikkut sungiusakkat nunarsuarmi pikkorinnerpaapput. Sooq taava tuluit sakkutuui immikkut sungiusakkat tulummik arnamik annaassinianngillat?

Annaassiniarnerup qanoq ililluni taama kinguneqarsinnaanera, qularnanngitsumik misissuisitanik pilersitsisoqarneranik kinguneqassaaq.