Arnap toquneranut atatillugu tigummigallagaasoqarpoq
Nuummi arnap sapaatip-akunnerani kingullermi toquneranut atatillugu ikinnerpaamik inuk ataaseq politiinit tigummineqarallarpoq.
Arnaq 58-inik ukiulik marlunngormat ullaakkut toqungasoq nassaarineqarpoq – arnaq sumik toqqutseqarsimanersoq paasiniarlugu, Nuummi politiit toqusimasut timaannik misissuisartunik Danmarkimiit aggersaapput.
Politiit pinerluuteqartoqarsimanersoq paasiniarlugu misissuinerminni tigummigallagaasoqaraangat killilimmik paasissutissiisinnaasarput.
- Misissuinerput pissutigalugu tigummigallagaasoqarnersoq oqaatigisinnaanngikkallarpara, vicepolitimester Bjørn Bay oqarpoq.
Misissuinermut attuumassuteqartumik Nuummi eqqartuussivik sapaatip-akunnerata matuma aallartilaarnerani angummik sapaatip-akunnerini sisamani tigummigallagaasussanngortitsivoq, tamannalu Nunatta Eqqartuussiviata ippassaq atuuttussanngortippaa.
Toqusoqarsimatillugu paasiniaasartoq ullumi tikippoq, ullunilu tullerni marlussunni misissuereeruni nalunaarusiussaaq, politiinit nalilersorneqartussamik.
